މިއަދުގެ ދެވަނަ މާރާމާރީ: ހިޔާ ފްލެޓުގައި މީހަކު ޒަޚަމް ކޮށްލައިފި

ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓުގެ އެޕާޓުމަންޓެއްގައި މީހަކަށް ތޫނު އެއްޗަކުން ހަމަލާދީ ޒަހަމްކޮށްލައިފިއެވެ.

މިއީ މިއަދު މިހާތަނަށް މާލޭ ސަރަހައްދުގައި ހިނގި ދެވަނަ މާރާމާރީއެވެ. ފުލުހުން މިއަދު ބުނީ ހުޅުމާލެ އެޗް ހައެއްގެ އެޕާޓުމަންޓެއްގައި މީހަކަށް ތޫނު އެއްޗަކުން ހަމަލާދީ ޒަހަމް ކޮށްލާފައިވާ ކަމަށެވެ. އަދި މިހާރު އެ ފްލެޓުގައި ފުލުހުން ހަރަކާތްތެރިވަމުން އަންނަ ކަމަށް ބުންޏެވެ.

ފުލުހުން ބުނީ އެ ހަމަލާގައި ޒަހަމްވި މީހާ އަށް ހޮސްޕިޓަލުގައި ފަރުވާ ދެމުން އަންނަ ކަމަށެވެ.

Advertisement

މިއަދު މެންދުރު ވެސް ވަނީ އޯކިޑްމަގު ރޫޓް ފިހާރަ ކައިރީގައި މާރަމާރީއެއް ހިންގާ އެކަކު ޒަޚަމްކޮށްލައިފައެވެ.

މިކަމާ ގުޅިގެން ފުލުހުން ބުނީ، އޯކިޑް މަގުގައި މާރާމާރީއެއް ހިނގާ މަންޒަރު ފުލުހުންގެ ސީސީޓީވީ ކެމެރާއިން ފެނިގެން 14:11 ހާއިރު އެޓެންޑްވި ކަމަށެވެ.

މި މާރާމާރީގައި ދިވެހި ފިރިހެނަކަށް ގެއްލުން ލިބިފައި ވާކަމަށާއި އޭނާއަށް އައިޖީއެމްއެޗުން ފަރުވާ ދޭކަމަށް ފުލުހުން ބުންޏެވެ. އޭނާގެ އުމުރު ފުލުހުން ހާމަކޮށްފައެއް ނުވެއެވެ.

ދުވަސްތަކަކަށް މާރާމާރީގެ ކަންކަން ހަމައަކަށް އެޅިފައި އޮތުމަށްފަހު އައްޑޫ ސިޓީއާއި މާލޭ ސިޓީގައި ވަނީ މާރާމާރީތައް އިތުރު ވެފައެވެ.

އެކަމުގެ ސަބަބުން ފުލުހުން ވަނީ އައްޑޫގައި ޚާއްސަ އޮޕަރޭޝަނެއް ވެސް ފަށާފައެވެ.