މި ސަރުކާރު ވެރިކަމަށް ހަވާލުވި ފަހުން މަސްވެރިންނަށް މިހާތަނަށް 561 މިލިއަން ރުފިޔާ ދޫކޮށްފައިވޭ: މިނިސްޓްރީ

މި ސަރުކާރު ވެރިކަމަށް ހަވާލުވި ފަހުން މަސްވެރިންނަށް މިހާތަނަށް 561 މިލިއަން ރުފިޔާ ދޫކޮށްފައިވާ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓްރީން ހާމަ ކޮށްފި އެވެ.

561 މިލިއަން ރުފިޔާއަކީ ތެލަށާއި އައިސް އަށް ދެވިފައިވާ ފައިސާ ހިމަނައިގެން މަސްވެރިންނަށް ދޫކޮށްފައިވާ ފައިސާ އެވެ.

މިނިސްޓްރީން އެކްސްގައި ކުރި ޕޯސްޓެއްގައި ވާ ގޮތުން އިއްޔެ ވެސް މިފްކޯއިން މަސްވެރިންނަށް 35 މިލިއަން ރުފިޔާ ޖަމާކޮށްފައިވެ އެވެ. 

Advertisement

އަދި ސަރުކާރުން މަސްވެރިންނަށް ވައުދުވެފައިވާ ގޮތުގެ މަތިން މިދިޔަ ބުދަ ދުވަހާއި އިއްޔެ ހިމެނޭހެން ޖުމްލަ 105 މިލިއަން ޖަމާކޮށް ދީފައިވާ ކަމަށް ވެސް ބުނެފައިވެ އެވެ. 

"ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންދަވަނީ މަސްވެރިންނަށް ދޭން ޖެހި ނުދެވިވާ ފައިސާ ދެއްކުމަށް ކަމާ ގުޅޭ އިދާރާތައް މެދުވެރިކޮށް ގިނަ ގުނަ މަސައްކަތްޕުޅުތަކެއް ކުރައްވަމުން،" މިނިސްޓްރީން ބުނެ އެވެ.

މީގެ އިތުރުން، ބެކްލޮގްގައި ހުރި ފައިސާ މަސްވެރިންނަށް ދެވޭނެ އިންތިޒާމް ހަމަޖެއްސުމަށް މިހާރު ވެސް މަސައްކަތް ކުރަމުންދާ ކަމަށް މިނިސްޓްރީން ބުނެ އެވެ. 

މަސްވެރިންނަށް ދޭން ޖެހޭ ފައިސާ ނުދެވި ލަސްވާތީ މަސްވެރިން ވަނީ ދާދި ފަހުން ވެސް އިހުތިޖާޖު ކޮށްފަ އެވެ.