މަނަދޫގައި މަރުވެފައި އޮތް އަންހެން މީހާގެ ހަށިގަނޑުގެ އެތައް ތަނަކަށް ހަމަލާދީފައި

Manadhoo gai maruvefai oih anhen meehaage hashigandunge ethah thanakah hamalaadheefai

މަނަދޫ ބަނދަރު ---

7 އެޕްރީލު 2023

ނ. މަނަދޫ ގެއެއްގައި މަރުވެފައި އޮއްވާ ފެނުނު އަންހެން މީހާގެ ހަށިގަނޑުގެ އެކި ތަންތަންނަށް ތޫނު އެއްޗަކުން ހަމަލާދީފައިވާ ކަން އެނގިއްޖެ އެވެ.

މަނަދޫގައި މިރޭ އިރާކޮޅު މަރުވެފައި އޮއްވާ ފެނުނީ އުމުރުން 62 އަހަރުގެ އެ ރަށު އަންނާރުމާގެ ނައީމާ މޫސާ އެވެ. އޭނާ މަރުވެފައި އޮއްވާ ފެނުނީ ހަބަރެއް ނުވެގެން އާއިލާއިން ފުލުހަށް އެންގުމުން، ފުލުހުން ގޮސް އޭނާގެ ކޮޓަރީގެ ދޮރުވައްޓާލައިގެން ވަނުމުންނެވެ.

މި ނޫހަށް އެނގިފައިވާ ގޮތުގައި އޭނާގެ ހަށިގަނޑުގެ އެކި ތަންތަނަށް ތޫނު އެއްޗަކުން ވަނީ ހަމަލާދީފަ އެވެ.

މަނަދޫ ކައުންސިލުގެ މެމްބަރަކު މި ނޫހަށް މައުލޫމާތު ދެމުން ބުނީ މަރުވެގެން އުޅޭ މީހާގެ ކަންކަން ފުލުހުންގެ ފޮރެންސިކް ޓީމުން ބަލަމުން ގެންދާ ކަމަށާއި، ކައުންސިލަށް މިވަގުތު އެއީ ބަޔަކު މަރާލާފައިވާ މީހެއްކަން ޔަގީންކޮށްނުދެވޭނެ ކަމަށެވެ. ނަމަވެސް ފުލުހުން މައްސަލަ ބަލަމުން އަންނާތީ އެކަމުގައި ވަކި އެއްޗެއް ދަންނަވަން ދަތި ކަމަށެވެ.

ނައީމާ އަކީ އެކަނި ގެއެއްގައި ދިރިއުޅެމުން ދިޔަ މީހެކެވެ. މިއަދު އިރުއޮއްސި 6:13 ހާއިރު އޭނާގެ ޚަބަރެއް ނުވެގެން ފުލުހުންނަށް ރިޕޯޓު ކުރީ އާއިލާ މީހުންނެވެ. އޭނާއަކީ ރަށުތެރެ ކުނި ކެހުމުގެ މަސައްކަތް ކުރަމުންދާ ކައުންސިލްގެ މުވައްޒަފެކެވެ. އަދި، އޭނާ މަސައްކަތަށް ނުނުކުމެ، މީހަކަށް ޚަބަރެއް ނުވާތާ ދެ ދުވަސް ވަނީ ވެފައެވެ.

އޭނާގެ މަރުގައި އިތުރަށް ބަލަންޖެހޭ ކަންތައްތަކެއް ހުރުމުން، ފުލުހުންނަށް ނާންގާ އެއްވެސް އުޅަނދެއް މަނަދޫއިން ބޭރަށް ނުދިއުމަށް އެރަށު ކައުންސިލުން ވަނީ އާންމުކޮށް އަންގާފަ އެވެ. ހަމައެއާއެކު ރަށަށް ދާ މީހުންވެސް ފުލުހުންނަށް އަންގާފައި ދިއުމަށް ވެސް ކައުންސިލުން އަންގާފައި ވެއެވެ.