މޯލްޑިވިއަންގެ ޓިކެޓު އަގުބޮޑުވީ ސިސްޓަމް އެރޯއަކުން

ގައުމީ އެއާލައިން، މޯލްޑިވިއަނުން އެތެރޭގެ މަންޒިލުތަކަށް ދަތުރުކުރާ ޓިކެޓުގެ އަގުތައް އަނެއްކާވެސް ބޮޑުކޮށް ވެބްސައިޓުގައި އާންމުވީ "ސިސްޓަމް އެރޯ" އަކުން ކަމަށް އެ އެއާލައިނުން ބުނެފި އެވެ.

މިކަމާ ގުޅިގެން ސޯޝަލް މީޑިއާގައި ގިނަ ބަޔަކު މޯލްޑިވިއަން އަށާއި ސަރުކާރަށް ފާޑުކިޔަމުންދާއިރު ގިނަ މަންޒިލުތަކުގެ ޓިކެޓު އަގު 100ރ. އާއި 200ރ. ދެމެދުގެ ރޭންޖެއްގައި ވަނީ ބޮޑުވެފަ އެވެ. މޯލްޑިވިއަންގެ ވެބްސައިޓުން އަދިވެސް ފެންނަނީ އެ އަގުތަކެވެ.

އެތެރޭގެ އުދުހުންތަކުގެ އަގު ދަށް ކުރުމަކީ ވޭތުވެދިޔަ ސަރުކާރާ އެއްގޮތަށް، ރައީސް ޑރ. މުހައްމަދު މުއިއްޒުގެ ސަރުކާރުންވެސް ވެފައިވާ ވައުދެކެވެ. އާންމުންގެ ފާޑުކިޔުން ސަރުކާރަށް އަމާޒުވީ މިކަމާ ގުޅިގެންނެވެ.

Advertisement

ޓިކެޓު އަގުބޮޑުވުމާ ގުޅިގެން މޯލްޑިވިއަންގެ ރަސްމީ ބަހެއް އަދި ނުލިބެއެވެ. ނަމަވެސް 'އަދަދު' ނޫހާ ވާހަކަދެއްކި މޯލްޑިވިއަންގެ މުވައްޒަފު ބުނީ ޓިކެޓު އަގުބޮޑުވި ކަމަށް ވެބްސައިޓު ދައްކަނީ 'ސިސްޓަމް އެރޯ' އެއްގެ ސަބަބުން ކަމަށާއި އެ މައްސަލަ ހައްލުކުރުމުގެ މަސައްކަތް މިހާރުވެސް ކުރަމުންދާ ކަމަށެވެ.

މޯލްޑިވިއަންއިން އަންނަނީ ރާއްޖޭގެ 16 މަންޒިލަކަށް ދަތުރުތައް ކުރަމުންނެވެ. އަދި ދުނިޔޭގެ އެކި ކަންކޮޅުތަކަށްވެސް މޯލްޑިވިއަން އިން އަންނަނީ ދަތުރުކުރަމުންނެ އެވެ.