މަޖިލީހުގެ ރައީސްކަމަށް އަބްދުއްރަހީމް އިންތިހާބުކޮށްފި

Majlis ge raees kamah Abdhuhraheem inthihaabukohfi

އަބްދުއްރަހީމް މަޖިލީހުގެ ރައީސްކަމަށް ހޮވުނީ 71 މެމްބަރުންގެ ވޯޓުން

28 މޭ 2024

މަޖިލީހުގެ ރައީސްކަމަށް ވެރިކަންކުރާ ޕާޓީ ޕީއެންސީއަށް ނިސްބަތްވާ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އިންތިހާބުކޮށްފި އެވެ.

ޕީއެންސީގެ ޗެއާޕާސަންކަން ވެސް ކުރައްވާ އަބްދުއްރަހީމް މަޖިލީހުގެ ރައީސްކަމަށް ހޮވުނީ 71 މެމްބަރުންގެ ވޯޓުންނެވެ.

އަބްދުއްރަހީމާއެކު މި މަގާމަށް ވާދަކުރެއްވީ ހިތަދޫ ދެކުނު ދާއިރާގެ އެމްޑީޕީ މެމްބަރު އިބްރާހިމް ނާޒިލެވެ. އޭނާ އަށް ލިބުނީ 15 ވޯޓެވެ.

ބާތިލު ވޯޓުގެ ގޮތުގައި 7 ވޯޓު ގުނާފައިވެއެވެ.

އަބްދުއްރަހީމް ވަނީ މީގެ ކުރިން ދެ ދައުރެއްގައި ފޮނަދޫ ދާއިރާގެ މެމްބަރުކަން ކުރައްވާފަ އެވެ. އެއީ 17 ވަނަ މަޖިލީހާއި 18 ވަނަ ރައްޔިތުންގެ މަޖިލީހުގަ އެވެ.

ސަރުކާރު ނިސްބަތްވާ ޕާޓީ، ޕީއެންސީން މަޖިލީހުގެ ނައިބުރައީސްކަމަށް ހޮވުމަށް ނިންމާފައިވަނީ ދިއްގަރު ދާއިރާގެ މެމްބަރު އަހުމަދު ނާޒިމެވެ. ނާޒިމް ވެސް 17 ވަނަ މަޖިލީހާއި 18 ވަނަ މަޖިލީހުގައި ދިއްގަރު ދާއިރާ ތަމްސީލު ކުރައްވާފައިވެ އެވެ. އަދި 18 ވަނަ މަޖިލީހުގައި މަޖިލީހުގެ ނައިބު ރައީސްކަން ވެސް އޭނާ ކުރައްވާފައިވެ އެވެ.