މަޖިލީހުގައި ތަފާތު ފިކުރުތަކަށް ޖާގަ އޮންނަން ވާނެ، މަސައްކަތްތައް ހިނގަން ވާނީ މަޖިލީހުގެ ގަދަރު އުފުލޭނެ ގޮތަކަށް: އަބްދުއްރަހީމް

ރައްޔިތުންގެ މަޖިލީހުގައި ދެކެވޭ ވާހަކަތަކުގައި ތަފާތު ފިކުރުތަކަށް ޖާގަ އޮންނަންވާނެކަމަށް ގަބޫލުކުރައްވާ ކަމަށާއި އެހެންނަމަވެސް މަޖިލީހުގެ މަސައްކަތްތައް ހިނގަން ވާނީ މަޖިލީހުގެ ގަދަރު އުފުލޭނެ ފަދަ ގޮތަކަށް ކަމަށް މަޖިލީހުގެ އާ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

މަޖިލީހުގެ ރައީސްކަމަށް ހޮވިވަޑައިގަތުމަށް ފަހު ދެއްކެވި ފުރަތަމަ ވާހަކަފުޅުގައި އަބްދުއްރަހީމް ވިދާޅުވީ މަޖިލީހުގައި ތިއްބެވި މެމްބަރުންނަކީ ރައްޔިތުންގެ ތާއީދު ލިބިގެން ރައްޔިތުންގެ ހައްގުގައި ވަކާލާތު ކުރުމަށް ހޮވާފައިވާ މެމްބަރުންތަކެއް ކަމަށެވެ. އަދި ރައްޔިތުންނާއި އެންމެ ގާތުން މަސައްކަތް ކުރާ ދައުލަތުގެ އެއް ބާރަކީ މަޖިލިސް ކަމަށާއި ރައްޔިތުންގެ ކަންކަމުގައި އެންމެ އިސްކޮށް މަޝްވަރާކޮށް ބަހުސް ކުރާނެ ތަނަކީ މަޖިލިސްކަން އަބްދުއްރަހީމް ފާހަގަކުރެއްވި އެވެ.  

އެހެންނަމަވެސް އެކަންކަން ހިނގަންވާނީ މަޖިލީހުގައި ކަރާމާތާއި މަޖިލީހުގެ ސުލޫކީ މިންގަނޑުތަކުގެ ތެރެއިން ކަމަށާއި ރައްޔިތުން މަޖިލީހުގެ މަސައްކަތްތަކާ މެދު ދިވެހި ރައްޔިތުން ފަހުރުވެރިވާނެ ގޮތަކަށް ކަމަށް ވިދާޅުވި އެވެ. އަދި ދިވެހިންގެ ހިތުގައި މަޖިލީހާއި މެދު އޮތް ގަދަރު އުފުލި މަޖިލީހުގެ މަސައްކަތްތައް ރައްޔިތުން ބަލައިގަންނާނެ ގޮތަކަށް މެމްބަރުންގެ މަސައްކަތްތައް ބައްޓަން ކުރަންވާނެ ކަމަށް ވިދާޅުވި އެވެ. 

Advertisement

މީގެ އިތުރުން ރައްޔިތުންގެ މަޖިލިސް އެކުލަވާލެވިގެން މިދަނީ ގައުމަށް މުހިންމު ދަނޑިވަޅެއްގައި ކަމަށް އަބްދުއްރަހީމް ވިދާޅުވި އެވެ. 

‏"މި ދަނޑިވަޅަކީ ގައުމެއްގެ ގޮތުގައި މުހިއްމު ނިންމުންތަކެއް ނިންމަން ޖެހިފައިވާ ދަނޑިވަޅެއް. އަޅުގަނޑުމެން މި ކޮނޑު އަޅަނީ ބޮޑު ބިޔަ މަސައްކަތެއް. މި ކަންކަމާ މެދު މަޝްވަރާ އާއި ބަހުސްކޮށް އެންމެ ފައިދާ ހުރި ގޮތަށް ކަންކަން ނިންމަމުން ދިޔުމުގައި މި މަޖިލިސް ވަރުބަލިވުމެއް ނެތި ދެމި އޮންނާނެ ކަމާމެދު ޝައްކެއް ނުކުރަން،" އަބްދުއްރަހީމް ވިދާޅުވި އެވެ. 

މަޖިލިސް އެކުލަވާލެވިގެން މިދިޔައީ މުހިންމު އާ ސިޔާސަތުތަކަކާ އެކީ އިންގިލާބީ ހެޔޮ ބަދަލެއް ރާއްޖެއަށް ގެނެސްދިނުމަށް މުޅިން އާ ރައީސަކާ އެކު މަސައްކަތް ފެށިތާ މަދު ދުވަސްކޮޅެއްގެ ތެރޭގައިކަން ފާހަގަކުރައްވައި މި މަޖިލިސް ވެގެންދާނީ ރައީސް ޑރ. މުހައްމަދު މުއިއްޒުގެ މަސައްކަތްތަކާ އެއް ހަމައެއްގައި ހިނގަންވާނެ މަޖިލީހަކަށް ކަމަށް ވިދާޅުވި އެވެ.

އެގޮތުން އަބްދުއްރަހީމް ފާހަގަކުރެއްވި ބައެއް ކަންކަމުގެ ތެރޭގައި އިގްތިސާދީ އަސާސުތައް ފުޅާކޮށް އާ މަސައްކަތްތަކާއި ފަންނުތަކާއި ވިޔަފާރިތައް އުފަންކޮށް މާލީ ފުދުންތެރިކަން އިތުރުކުރެވޭނެ ގޮތްތައް ހޯދައި އުމްރާނީ ތަރައްގީގެ އާ ހަރުފަތްތައް ރާއްޖެއަށް ތައާރަފްކުރުން ހިމެނެ އެވެ. 

އަބްދުއްރަހީމް މަޖިލީހުގެ ރައީސްކަމަށް އިންތިހާބުވީ 71 މެމްބަރުންގެ ވޯޓުންނެވެ.