މާފަރުގައި ތަފާތުކަމެއް، "ބެންބޫ ޕާކެއް" ތަރައްޤީ ކުރަނީ

Maaafarugai thafaathu kameh, "Bamboo park" eh tharaghee kuranee

ފޮޓޯ:| ނ.މާފަރު ފޭސްބުކް ޕޭޖް

22 ޖުލައި 2023

ނ. މާފަރުގައި އެޓްމޮސްފިއާ ފައުންޑޭޝަން އާއި ގުޅިގެން ބެންބޫ (އޮނު) ޕާކެއް ތަރައްޤީ ކުރުމުގެ މަސައްކަތް ފަށައިފިއެވެ.

މި މަސައްކަތް ފެށުމުގެ ގޮތުން 22 ޖުލައި 2023ގައި މާފަރު ސުކޫލްގައި ރައްޔަިތުންނަށް މަޢުލޫމާތު ދިނުމުގެ ސެޝަންއެއް ވަނީ ކުރިއަށް ގެންގޮސްފައެވެ. އެޓްމޮސްފިއާ ފައުންޓޭޝަންގެ އެހީ އާއިއެކު ކުރިއަށް ގެންދާ މި ޕްރޮޖެކްޓުގައި އެ ފައުންޑޭޝަންގެ ފަރާތުން މާފަރަށް 1000 ބެންބޫ (އޮނު) ގަސް ހަދިޔާ ކޮށްފައިވެއެވެ.

މާފަރު ކައުންސިލްގެ ރައީސް މުޙައްމަދު އަދުނާން ރަށްފުށު އޮންލައިންއަށް މަޢުލޫމާތު ދެއްވި ގޮތުގައި، މާފަރުގައި ހިންގުމަށް ރޭވިފައި މިވާ ބެންބޫ ޕާކް ޕުރޮޖެކްޓްއަކީ، ކައުންސިލްގެ ގުރީން ރޯޑް ޕްރޮގްރާމާއި ގުޅި ލާމެހިގެން ދާނެ ޕްރޮޖެކްޓެކެވެ. މި ޕްރޮޖެކްޓުގެ ދަށުން ބެންބޫ ޕާކުގެ ގޮތުގައި ޙާއްސަ ސަރަހައްދެއް ތަރައްޤީ ކުރެވިގެންދާ އިރު، ރަށުގެ އެކި ހިސާބުތަކުގައި ވެސް އިތުރު ގަސް އިންދުމަށް ހަމަޖެހިފައިވެއެވެ.

"އަޅުގަނޑުމެން ހެދި ދިރާސާތަކުންނާއި، މަޢުލޫމާތު ދޭފަރާތްތަކުން ބުނެފައިވަނީ، ބޭންބޫ (އޮނު) ގަހަކީ ނޭވާހިއްލާ ބައްޔަށް އެ ގަސްތަކުގެ މާޙާއުލުން ޝިފާ ލިބޭ އެއްޗެއްކަމަށް، އެހެންކަމަން މި ފަދަ ޕާކެއް ތަރައްޤީ ކުރެވުމަކީ ދުވަސްވީ މީހުންނަށާއި މުޖުތަމާޢުގެ އެހެން ފަރާތްތަކަށް ސިއްޙީ ފައިދާތަކެއް ލިބިގެން ދާނެ ކަމަކަށް ވާނެއެވެ." މާފަރު ކައުންސިލް ރައީސް މަޢުލޫމާތުދިނެވެ.

އޮޓްމޮސްފިއާ ފައުންޑޭޝަންގެ ފަރާތުން މި ދިޔަ މޭ މަހުގައި، މިނިސްޓްރީ އޮފް އެންވާރުމެންޓް، ކުލައިމެޓް ޗޭންޖް އެންޑް ޓެކްނޮލޮޖީ އާއި މިނިސްޓްރީ އޮފް ފިޝަރީސް، މެރިން ރިސޯސް އެންޑް އެގްރިކަލްޗާ އާއި ގުޅިގެން " ބެންބޫ ފޯ ކުލައިމެޓް ޗޭންޖް " ގެ ނަމުގައި ރާއްޖޭގައި ވަނީ ޕޮރޮޖެކްޓެއް ލޯންޖްކޮށްފައެވެ.