އެލްޖީއޭ އިން އެންގި ގޮތަށް ބަޔާން ބާތިލުކުރެވެން ނެތްކަމަށް ކެނދިކުޅުދޫ ކައުންސިލުން ބުނެފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ނ. ކެނދިކުޅުދޫއަށް ކުރެއްވި ރަސްމީ ދަތުރުފުޅުގައި އާންމުންނަށް ބައްދަލުކުރެއްވުމަށް ބޭއްވި ބައްދަލުވުމުގައި މަޖިލީހަށް ވާދަ ކުރައްވާ ސަރުކާރު ކެންޑިޑޭޓަށް ތާއީދުކޮށް ދެއްކެވި ވާހަކަތައް އެ ރަށު ކައުންސިލުން ކުށްވެރިކޮށް ނެރުނު ބަޔާން ބާތިލްކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ)އިން އެންގި ނަމަވެސް އެކަން އެގޮތަށް ކުރެވެން ނެތްކަމަށް ކައުންސިލުން ބުނެފި އެވެ.

އާންމުންނާ ބައްދަލުކުރުމަށް ބޭއްވި ބައްދަލުވުމުގައި ރައީސް ޑރ. މުއިއްޒު ސަރުކާރު ކެންޑިޑޭޓަށް ތާއީދުކޮށް ސިޔާސީ ވާހަކަ ދެއްކުމަކީ ކުރެވޭނެ ކަމެއް ނޫންކަމަށް ބަޔާންކޮށް ރަށު ކައުންސިލުން ބަޔާނެއް ނެރުމުން، ރާއްޖޭގެ އިއްޒަތްތެރި ރައީސުލްޖުމްހޫރިއްޔާގެ މަގާމުގެ މަސްއޫލިއްޔަތުތަކާއި ނިންމާ ނިންމުންތަކާއި ދެކޮޅަށް ކައުންސިލްތަކުން ނޫސްބަޔާން ނެރުމަކީ ކައުންސިލްތަކަށް ލިބިފައިވާ ގާނޫނީ ބާރެއް ނޫންކަމަށް ބުނެ އެ ބަޔާން ބާތިލްކުރުމަށް އެލްޖީއޭ އިން އެންގި އެވެ.

ބަޔާން ބާތިލްކުރުމަށް އެންގި ސިޓީގެ ޖަވާބުގައި މިއަދު ކައުންސިލުން އެލްޖީއޭއަށް ފޮނުވި ޖަވާބު ސިޓީގައި ރަށު ކައުންސިލްތަކަކީ، އެ ގާނޫނުގެ 21 ވަނަ މާއްދާގައި ބަޔާންކުރާ ގޮތުގެ މަތިން، ސަރުކާރާއި ވަކިން އަމިއްލަ ނަމުގައި ދައުވާ ކުރުމާއި، ދައުވާ ލިބިގަތުމުގެ ބާރު ލިބިފައިވާ އަދި އަމިއްލަ ނަމުގައި މުއާމަލާތް ކުރުމުގެ ބާރު ލިބިގެންވާ ވަކި ސިއްކައެއް އޮންނަ ގާނޫނީ ޝަހުސެއް ކަމަށް ބުނެފައިވެ އެވެ. އަދި ކައުންސިލްތަކަކީ ބާރު ލިބިގެން ނުވާ، ސަރުކާރުގެ ދަށުން ހިނގާ ސަރުކާރު އިދާރާއެއްގެ ގޮތުގައި ސިފަ ކުރުމަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ރޫހާއި ހިލާފު ކަމެއްކަމަށް ކައުންސިލްގެ ސިޓީގައި ފާހަގަކޮށްފައިވެ އެވެ.

Advertisement

މީގެ އިތުރުން ރަސްމީ ހަފްލާތަކުގައި ހިފަހައްޓަމުން އަންނަ ޕްރޮޓޮކޯލްތަކާއި، އަދަބުތަކާއި އަހްލާގީ މިންގަނޑުތަކުން ބޭރުވެ، ކަނޑައެޅިގެން ދައުލަތުގެ ވަސީލަތްތަކާއި ރަސްމީ ހައިސިއްޔަތުގެ ބޭނުން ޖާއިޒުނޫން ގޮތެއްގައި ހިފައި، ވަކި ފަރާތްތަކެއްގެ ވަކި ސިޔާސީ މަގްސަދުތަކާއި މަސްލަހަތުތައް ކުރިއެރުވުމަށް ކުރެވޭ ކަންކަން ވަރިހަމަކޮށް، އެކަމާއިމެދު ބަހެއް ނުބުނެ ތިބުމަކީ ގާނޫނުގެ ވެރިކަމުގެ އަސާސާއި ހިލާފު ކަމަކަށް ވުމުގެ އިތުރުން ކައުންސިލަށް ރަށުގެ ރައްޔިތުން ކުރާ އިތުބާރަށް ވެސް އަސަރުކުރާނޭ ކަމެއްގެ ގޮތުގައި ކައުންސިލުން ސިފަ ކުރެ އެވެ.

އެލްޖީއޭ އިން ކައުންސިލަށް ފޮނުވި ސިޓީގައި، ކައުންސިލްގެ ބަޔާން ބާތިލުކުރަން ޖެހޭ ވަރުގެ ސަބަބެއް ދެއްކިފައިނުވާ ކަމަށް ވެސް، ކައުންސިލުން ބުނެފައިވެ އެވެ.

އަދި ކައުންސިލްގެ ބާރު ކަނޑުވާލައި، އިދާރީ ދާއިރާތައް ލާމާރުކަޒީ އުސޫލުން ހިންގުމުގެ ގާނޫނުގެ ތަސައްވުރާއި މަގްސަދު ގެއްލުވާލައި ކައުންސިލްގެ ބާރުތައް ކަނޑުވާލުމަށް މަސައްކަތް ނުކުރުމަށް ވެސް ކައުންސިލުން އެލްޖީއޭއަށް ގޮވާލާފައިވެ އެވެ.