ކެނދިކުޅުދޫއިން ސިޔާސީ ޕާޓީތަކަށް ބިންދޫކުރުމަށް ހުޅުވާލައިފި

Kendhikulhudhoo in siyaasy party thakah bin dhookurumah hulhuvaalaifi

ރައީސް ސޯލިހްއަށް ކެނދިކުޅުދޫއިން ކިޔާފައިވާ މަރުހަބާ -- ފޮޓޯ/އެމްޑީޕީ

12 މާރިޗު 2023

ކެނދިކުޅުދޫ އިން ދިވެހިރާއްޖޭގައި ރަޖިސްޓްރީ ކުރެވިގެން ހިންގާ ސިޔާސީ ޕާޓީތަކުގެ ހަރަކާތްތައް ހިންގުމަށްޓަކައި ރަށުގެ ލޭންޑް ޔޫސް ޕްލޭންގައި އެކި ބޭނުންތަކަށް ކަނޑައެޅިފައިވާ ބިންތަކުގެ ތެރެއިން ސިޔާސީ ޕާޓީތަކަށް ދޫކުރުމަށް ކަނޑައެޅިފައިވާ ބިންތައް ދޫކުރުމަށް ހުޅުވާލައިފިއެވެ.

ކެނދިކުޅުދޫގެ ލޭންޑްޔޫސް ޕްލޭނުގައި ކަނޑައެޅިފައިވާ ގޮތުގެ މަތިން ޕާޓީތަކަށް ދޫކުރުމަށް ހަމަޖެހިފައިވަނީ ދެ ބިމެވެ. އަދި މި ބިން ދޫކުރާނީ ކައުންސިލުން ކަނޑައަޅާ މިންގަނޑުތަކަށް ފެތޭ ޕާޓީތަކަކަށް އެކަނި ކަމަށް ކައުންސިލުން ވަނީ ބުނެފައެވެ. އެގޮތުން ބިން ހޯދުމަށް އެދޭ ޕާޓީއަކީ ކެނދިކުޅުދޫގެ ރަށްވެހިން ހިމެނޭ ޕާޓީއަކަށްވުމާއި ޕާޓީގައި މަދުވެގެން 10،000 މެމްބަރުން ތިބުން ހިމެނެއެވެ.

ސިޔާސީ ފޯރި ރާއްޖޭގައި ގަދަވަމުންދާ މި ދަނޑިވަޅުގައި ކެނދިކުޅުދޫއިން ދޫކުރުމަށް ހަމަޖެހިފައިވާ ބިންތައް ހޯދުމަށް ސިޔާސީ ޕާޓީތަކުން އެކަމަށް ހާއްސަ ފޯމު ނަންގަވައި އެ ފޯމާއެކު ހުށައަޅަންޖެހޭ ލިޔުންތައް ހުށައެޅުމަށް މިހާރު އޮތީ ފުރުސަތު ހުޅުވާލައިފައެވެ. އެގޮތުން މި ބިންތައް ހޯދުމަށް ޝަރުތުހަމަވާ ޕާޓީތަކަށް ބީލަމަށް ހުޅުވާލަން ނިންމާފައިވާއިރު، މިކަމާ ބެހޭ މައުލޫމާތު ދިނުމުގެ ސެޝަނެއް މި މަހުގެ ހަތްވަނަ ދުވަހު ކެނދިކުޅުދޫ ކައުންސިލުގެ މީޓިންގް ރޫމުގައި ކުރިއަށްދާނެއެވެ. އަދި ބިންތަކުގެ ބީލަން ހުޅުވާލުން ރަސްމީކޮށް އޮންނާނީ މި މަހުގެ 12 ވަނަ ދުވަހުއެވެ.

ސިޔާސީ ޕާޓީތަކަށް ދޫކުރެވޭ ކޮންމެ ބިމެއްވެސް ދޫކުރެވޭނީ ކުއްޔަށްދިނުމުގެ އުޞޫލުން، އަކަފޫޓަކަށް 15.0ލ ( ފަނަރަ ލާރި) ގެ ނިސްބަތުން ކޮންމެ މަހަކު ބިން ދޫކުރެވޭ ޕާޓީއިން ކައުންސިލަށް ކުލި ދައްކާ ގޮތަށްކަމަށް ކައުންސިލުން ވަނީ ބުނެފައެވެ. މިއުސޫލުގެ ދަށުން ކަނޑައެޅޭ އަކަފޫޓުގެ ކުލީގެ ރޭޓު، ޤައުމުގެ އިގުތިސާދީ ޙާލަތަށް އަންނަ ބަދަލާއި، އާންމު ދިރިއުޅުމާއި ތަކެތީގެ އަގުތަކަށް އަންނަ ބަދަލާއި ރަށުގެ ބިމުގެ ޑިމާންޑަށް ބަލާ ރިވިއުކުރުމުގެ ފުރުސަތު ކައުންސިލަށް އޮންނާނެ ކަމަށް ވެސް ވަނީ ބުނެފައެވެ.

ކެނދިކުޅުދޫ ކައުންސިލްގެ ސެކެއްޓަރީ ޖެނެރަލް މުހައްމަދު ހުޒާމް ރަށްފުށު އޮންލައިނަށް ވިދާޅުވީ ސިޔާސީ ޕާޓީތަކަށް ބިންތައް ދޫކުރުން ލަސްވެގެން ދިޔައީ ގާނޫނީ ގޮތުން އެކަމަށް ހުރި ހުރަސަތަކެއް ސަބަބުން ކަމަށެވެ. އަދި ސިޔާސީ ޕާޓީތަކަށް ބިން ދޫކުރުމަކީ ހަގީގަތުގައި ލާމަރުކަޒީ ގާނޫނޫ ދަންނަކަމެއް ނޫންކަމަށާއި، އެހެން ނަމަވެސް ލޭންޑް ޔޫސް ޕްލޭނުގައި ޕާޓީތަކަށް ބިން ދޫކުރުމަށް ކަނޑައަޅާފައި އޮތުމާއެކު އެކަން ކުރުމަކީ މައްސަލައެއް ނޫންކަމަށް ކައުންސިލުން ނިންމެވީ ކަމަށެވެ.