ކެނދިކުޅުދޫ ހޮސްޕިޓަލާ ގުޅޭ ގޮތުން ސޯލިހު ދެއްކެވި ވާހަކަތައް، ކޮރަޕްޝަންގެ ތުހުމަތަކާއެކު ހެލްތް މިނިސްޓަރު ދޮގު ކުރައްވައިފި

Kendhikulhudhoo hospital aa gulhey gothun Solih dhekkevi vaahakathah, corruption ge thuhumathaa eku health minister dhogu kuravvaifi

ހެލްތް މިނިސްޓަރު ޑރ. އަބްދުﷲ ހަލީލް --- ފޮޓޯ: ރައީސް އޮފީސް

5 މާރިޗު 2024

ކުރީގެ ރައީސް އިބްރާހިމް މުހައްމަދު ސޯލިހު ކެނދިކުޅުުދޫއަށް ވަޑައިގެން އެ ރަށުގެ ހޮސްޕިޓަލްގެ ފައިނޭންސް ކުރީގެ ސަރުކާރުން ހަމަޖައްސާފައި ވާނެ ކަމަށް ބުނެ ދެއްކެވި ވާހަކަތައް ދޮގުކުރައްވައި އެ ހޮސްޕިޓަލްގެ ކޮންޓްރެކްޓް ހަވާލުކޮށްފައިވަނީ މާ ބޮޑު އަގެއްގައި ކަމަށް ވިދާޅުވެ ހެލްތް މިނިސްޓަރު ޑރ. އަބްދުﷲ ހަލީލް ކުރީ ސަރުކާރަށް ކޮރަޕްޝަންގެ ތުހުމަތު ކުރައްވައިފިއެވެ.

ރައީސުްލްޖުމްހޫރިއްޔާ ޑރ. މުހައްމަދު މުއިއްޒު މިހާރު ރާއްޖޭގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރޭ ދ. މީދޫގައި ކުރިއަށް ދިޔަ ޖަލްސާގައި ވާހަކަފުޅު ދައްކަވަމުން ހަލީލް ވިދާޅުވީ ކެނދިކުޅުދޫގައި 30 އެނދުގެ ހޮސްޕިޓަލެއް އިމާރާތްކުރުމަށް ކޮންޓްރެކްޓާ ފައިނޭންސް އުސޫލުން 5 ޖެނުއަރީ 2023 ގައި ބަޔަކާ ހަވާލުކޮށްފައިވާ ކަމަށެވެ. އެހެންނަމަވެސް އެ ކޮންޓްރެކްޓަރަށް ފައިނޭންސް ހޯދޭނެ އެއްވެސް ގޮތެއް ހަމަޖައްސަވާ ދެއްވައިފާ ނުވާކަމަށް ހަލީލް ވިދާޅުވިއެވެ.

ހަލީލް އިތުރަށް ވިދާޅުވީ އެ ކޮންޓްރެކްޓަރަށް ފައިސާ ހޯދާނެ މަގު ތަނަވަސްކޮށް ދިނީ މި ސަރުކާރުން ކަމަށެވެ. އަދި ރައީސް ޑރ. މުއިއްޒު ބޭނުންފުޅު ވަނީ ރާއްޖޭގެ އެއްވެސް ހިސާބެއްގައި ފަށާފައިވާ ޕުރޮޖެކްޓެއް ނުހުއްޓި ކުރިއަށް ގެންގޮސް ރައްޔިތުންނަށް އޭގެ މަންފާކުރުން ކަމަށް މިނިސްޓަރު ވިދާޅުވި އެވެ.

"އެންމެ މޮޅެތި އިންޖިނިއަރުން އަޅުގަނޑުމެންނަށް ދެއްވާފައި އޮތް ލަފަޔަކީ، އެވަރުގެ ހޮސްޕިޓަލެއް ހެދޭނެ އެންމެ ބޮޑުވެގެން 135 މިލިއަން ރުފިޔާއަށް ކަމަށް" މިނިސްޓަރު ހަލީލް ވިދާޅުވި އެވެ.

އެ ހޮސްޕިޓަލަކީ 135 މިލިއަން ރުފިޔާ ހެދެން އޮތް ހޮސްޕިޓަލެއް ކަމަށްވާއިރު، 193 މިލިއަން ރުފިޔާއަށް ހޮސްޕިޓަލުގެ މަސައްކަތް ހަވާލުކޮށްފައި އޮތްކަމަށް ވިދާޅުވެ ކުރީ ސަރުކާރަށް ހަލީލް ކޮރަޕްޝަންގެ ތުހުމަތު ކުރެއްވި އެވެ.

ކެނދިކުޅުދޫގެ 30 އެނދުގެ ހޮސްޕިޓަލް ޕުރޮޖެކްޓަކީ ސާސް.އީ ކުންފުންޏާ ކޮންޓްރެކްޓް ކުރެވިގެން ބޭންކު ލޯނުން ފައިނޭންސްކޮށް ކުރިއަށް ގެންދިއުމަށް ރާވިފައިވާ ޕުރޮޖެކްޓެކެވެ. މިހާރު މި މިހޮސްޕިޓަލް އިމާރާތް ކުރުމުގައި ފުރަތަމަ ފަންގިފިލާގެ ކޮންކުރީޓް ޝީޓް އެޅުމަށް ވަނީ ތައްޔާރުވެފައެވެ.