ކާބޯ ތަކެތި ބަރުކޮށްފައިވާ ޓްރަކްތައް ޢައްޒާއަށް ނުވަދެވިފަ

ފަލަސްތީނުގެ ޢައްޒާގައި ކުށެއް ނެތި އަނިޔާ ލިބެމުންދާ ރައްޔިތުންނަށް ބޭނުންވާ ކާބޯތަކެތި ބަރުކޮށްފައިވާ ޓްރަކްތަށް ޢައްޒާއަށް ނުވަދެވިފައި ތިބި ކަމަށް އދ.ގެ ވޯލްޑް ފުޑް ޕުރޮގްރާމް ގެ ޑިރެކްޓަރ ފޯ އެމަޖެންސީސް ސަމެރް އަބްދުލްޖަބެރް ވިދާޅުވެއްޖެއެވެ.

މިހާރު ޢައްޒާގެ މުޅި އާބާދީއަށް ބޭނުންވާ ވަރަށް ކަނާ ލިބިފައިވާ ކަމަށާއި، ކާނާ ބަރުކޮށްގެން ތިބި ޓްރަކްތަށް އެތިބީ ޢައްޒާގެ ބޯޑަރު ކައިރީގައި ޢައްޒާއަށް ވަދެވޭނެ އިރެއްގެ އިންތިޒާރުގައި ކަމަށް ސަމެރް އަބްދުލްޖަބެރް ވިދާޅުވިއެވެ. ސަމެރް އިތުރަށް ވިދާޅުވީ  ހަނގުރާމައިގައި ސުންނާފަތިވެފައިވާ ޣައްޒާގެ ސަރަހައްދުތަކަށް އެ އެހީ ފޯރުކޮށްދިނުމުގައި އެ ޖަމިއްޔާއަށް ބޮޑެތި ދަތިތަކާއި ކުރިމަތިލާނޖެހޭ ކަމަށެވެ. އެގޮތުން މިހާރު ވެސް އިސްރާއީލުގެ ސިފައިން ހަމަލާތައް ހުއްޓާނުލާ ކުރިއަށް ގެންދަމުންދާތީ އެހީގެ ޓުރަކްތަކަށް ދަތުރު ކުރަން ވަރަށް އުނދަގޫ ވެފައިވާ ކަމަށް އޭނާ ވިދާޅުވި އެވެ.

ޣައްޒާއަށް ވަންނަ ހުރިހާ ވެހިކަލްތަށް އަދި އެހީގެ ހުރިހާ ޓްރަކެއް  ވެސް އިސްރާއީލުން ދަނީ ވަރަށް ރަނގަޅަށް ބަލައި ފާސްކުރަމުންނެވެ. އޭގެ ސަބަބުން ޓުރަކްތަކަށް ޣައްޒާއަށް ނުވަދެވި ބޯޑަރުގެ ބޭރުގައި އެތައް ދުވަހަކު މަޑުކުރަން ޖެހެއެވެ. މިފަދަ ކަންކަމުގެ ސަބަބުން ޣައްޒާގެ ރައްޔިތުން އެ އެހީއިން މަހްރޫމުވެގެން ނުވާނެ ކަމަށާއި، ހުރިހާ ގައުމަކުން ވެސް އެކަމަށްޓަކައި މަސައްކަތް ކުރަންވާނެ ކަމަށެވެ. އަދި ލަސްވާ ވަރަކަށް ކުށެއް ނެތް އެތައް ބަޔެއްގެ ފުރާނަ ނުރައްކަލަށް ހުށައެޅިގެން ދާކަމަށް ސަމެރް ވިދާޅުވިއެވެ.

Advertisement

ފަލަސްތީނުގެ މުޅި ޣައްޒާގައި ބަނޑުހައިހޫނުކަން ފެތުރިފައިވާ އިރު ދެކުނު ޣައްޒާގައި މިއަދު ވަނީ ފަލަސްތީނުގެ ދެ މަހުގެ ތުއްތު ކުއްޖަކު ބަނޑުހައިހޫނު ކަމުގެ ސަބަބުން ޝަހީދުވެފައެވެ.