އިސްރާއީލަށް ވާގިވެރިވާ ސްޓާބަކްސް ބޮއިކޮޓް ކުރުމުން އެކުންފުންޏަށް 11 ބިލިއަން ޑޮލަރުގެ ގެއްލުންވެއްޖެ

Israel ah vaagiverivaa Starbucks boycott kurumun ekunfunyah 11 billion dollar ge gehlun vejje

ސްޓާބަކްސް އައުޓްލެޓެއް

7 ޑިސެންބަރު 2023

ބިސްނަސް ސްޓޭންޑާޑް (ނޮވެމްބަރު 7) - އިސްރާއިލަށް ވާގިވެރިވާކަމަށް ބުނެ މަގްބޫލް ކޮފީއަށް ހާއްސަ ކުންފުނި، ސްޓާބަކްސް ބޮއިކޮޓް ކުރުމާ ގުޅިގެން 11 ބިލިއަން ޑޮލަރު އެކުންފުންޏަށް ގެއްލުން ވެފައިވާ ކަމަށް ރިޕޯޓްތަކުން ބުނެފިއެވެ.

އިސްރާއިލުން ފަލަސްތީނަށް ކެނޑިނޭޅި ދެމުންގެންދާ ހަމަލާތައް ދުވަހަކަށްވުރެން ދުވަހެއް އިތުރުކުރަމުން އަންނަ އިރު، މުސްލިމް ކޮމިއުނިޓީތަކުން އަންނަނީ އިސްރޭލަށް ވާގިވެރިވާ ކުންފުނިތަކާއި ބްރޭންޑްތައް ބޮއިކޮޓް ކުރަމުންނެވެ. އެގޮތުން ކޮކަކޯލާއާއި ނެސްލޭ އަދި ކޭއެފްސީގެ އިތުރުން މެކްޑޮނާލްޑް ފަދަ މަޝްހޫރު ބްރޭންޑްތައް ހިމެނެއެވެ.

މުސްލިމް ކޮމިއުނިޓީތަކުން ބޮއިކޮޓްކޮށްފައިވާ މި ބްރޭންޑްތަކަށް ޑިމާންޑް ކުޑަވެ، ބައެއް ގައުމުތަކުގައި މިހާރު އޭގެ އައުޓްލެޓްތައް ވެސް ހުއްޓާލުމާ ގާތަށް ގޮސްފައިވާއިރު، ދުނިޔޭގެ އެތައް ގައުމެއްގައި އެންމެ މަގްބޫލް ކޮފީއަށް ހާއްސަ ސްޓާބަކްސްއަށް ވެސް އެކަމުގެ ސަބަބުން ވަނީ ބޮޑު ގެއްލުމެއް ވެފައެވެ. އެގޮތުން މިދިޔަ މަހެއްހާ ދުވަހުގެ ތެރޭގައި އެ ކުންފުނީގެ އަގު ވަނީ 9.4 އިންސައްތަ ވެއްޓިފައެވެ. އެއީ ގައިގަނޑަކަށް 11 ބިލިއަން ޑޮލަރުގެ ގެއްލުމެކެވެ.

މީގެ އިތުރުން އެ ކުންފުނީގެ ސްޓޮކް ވެސް ވަނީ ވަރަށް ބޮޑުތަނުން ވެއްޓިފައެވެ. މިއަހަރު ފެށި އިރު، 115 ޑޮލަރަށް ހުރި ޝެއާ މިހާރު ހުރީ 95 ޑޮލަރަށް ޝެއާއެކެވެ. ސްޓާބަކްސްއިން ވަނީ އެ ކުންފުނީގެ ބައެއް އައުޓްލެޓްތަކުގައި މަސައްކަތް ކުރާ ސްޓާފުން ފަލަސްތީނަށް ތާއީދުކޮށްގެން ފިޔަވަޅު އަޅައިފައެވެ.

ޣައްޒާގެ މުސްލިމުންނާ ދެކޮޅަށް ޔަހޫދީ އިސްރާއީލުން ހިންގަމުންދާ ލާއިންސާނީ ޖަރީމާތަކުގައި މިހާތަނަށް ޝަހީދު ކޮށްލާފައިވާ މީހުންގެ ޢަދަދު ވަނީ 15,899 އަށް އަރައިފައިއެވެ. އޭގެ ތެރެއިން 70 އިންސައްތަ މީހުންނަކީ ކުޑަކުދިންނާއި އަންހެނުންނެވެ. ހަމަލާތަކުގައި ޒަޚަމުކޮށްލާފައިވާ މީހުންގެ ޢަދަދު މިހާރު ވަނީ 42,000 އަށް އަރާފައެވެ.