ޖޫން މަހު ނޫނު އަތޮޅުގައި ފަށަން ބުނި އާރްޓީއެލްގެ ހިދުމަތް މަސް ނިމުނު އިރު ވެސް ފެށޭ ގޮތެއް ނުވި

ޖޫން މަހު ނޫނު އަތޮޅުގައި ފަށަން ބުނި އާރްޓީއެލްގެ ހިދުމަތް މަސް ނިމުނު އިރު ވެސް ފަށާފައި ނުވާތީ އަތޮޅުގެ ރައްޔިތުން ހިތްހަމަ ނުޖެހުން ފާޅު ކުރަން ފަށައިފި އެވެ.

މެއި މަހުގެ ފަހުކޮޅު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓްރާންސްޕޯޓު މިނިސްޓަރު މުހައްމަދު އަމީން ވަނީ ތިން އަތޮޅެއްގައި ވަރަށް އަވަހަށް އާރްޓީއެލްގެ ހިދުމަތް ފަށާނެ ކަމަށް ވިދާޅުވެފަ އެވެ.

އެންމެ އަވަހަށް ފަށާނީ ނ އަތޮޅުގައި ކަމަށާއި ޖޫން މަހުގެ ތެރޭގައި ނ އަތޮޅުގައި އާރްޓީއެލްގެ ހިދުމަތް ފަށާނެ ކަމަށް ވިދާޅުވެފައިވެ އެވެ. ނ އަތޮޅުގެ މަޖިލިސް މެމްބަރުން ވެސް އެ ޔަގީންކަން ދެއްވާފައިވެ އެވެ.

Advertisement

އެހެންނަމަވެސް، މަސް ނިމުނު އިރުވެސް އެ ހިދުމަތް ފަށާފައި ނުވާތީ ގިނަ ބަޔަކު އަންނަނީ އެ ހިދުމަތް ފެށޭނެ ދުވަހަކާ މެދު ސުވާލު އުފައްދަމުންނެވެ.

މައުލޫމާތު ލިބޭ ގޮތުގައި އެ ހިދުމަތް ފެށުމަށް ސަރުކާރުން އަންނަނީ މިހާރު ވެސް މަސައްކަތް ކުރަމުންނެވެ. މި ވަގުތު ކުރިއަށް ދަނީ ޓެސްޓު ކުރުމުގެ މަރުހަލާތައް ކަމަށް މައުލޫމާތު ލިބެ އެވެ.

އާރްޓީއެލްގެ ހިދުމަތް މިހާރު ލިބެމުން ދަނީ ހއ، ހދ، ށ، ޅ، ގއ، ގދ، ފުވައްމުލައް އަދި އައްޑޫ ސިޓީ އަށެވެ.