ޖަމުޢިއްޔާތައް އުވާލާ ލިސްޓް އޮތީ އަޕްޑޭޓް ނުކޮށް، އެކަން ރަނގަޅުކުރަން މަހްލޫފް އަންގަވައިފި

Jamiyyaatha uvaalaa list othy update nukoh, Ekan rangalhu kuran Mahloof angavaifi

ކުޅިވަރާ ބެހޭ ވަޒީރު އަހުމަދު މަހްލޫފް ކުޅުދަށްފުށްޓަށް ކުރި ދަތުރުގެ ތެރެއިން - ފޮޓޯ.ކޭއޯ

27 ޖުލައި 2023

ދިވެހިރާއްޖޭގައި ރަޖިސްޓަރީ ކޮށްގެން ހިންގަމުންދާ ޖަމްއިއްޔާތަކުގެ ތެރެއިން ލިޔެކިޔުންތައް ފުރިހަމަނުވާ ޖަމްއިއްޔާތައް އުވާލަން ނިންމާ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމަންޓް އިން ނެރުނު ލިސްޓު އޮތީ އަޕްޑޭޓް ނުކޮށްކަން ހާމަވެއްޖެއެވެ.

ޔޫތު މިނިސްޓްރީން ކުރި އިއުލާނުގައިވަނީ 2023 ވަނަ އަހަރުގެ ނިޔަލަށް ވިދިވިދިގެން 2 އަހަރުގެ އަހަރީ ރިޕޯޓް ހުށަހަޅާފައި ނުވާތީ ނުވަތަ ހިންގާ ކޮމެޓީ ރަޖިސްޓްރީ ކޮށްފައި ނުވާތީ 1989 ޖަމިއްޔާ އުވާލުމަށް ނިންމާފައިވާ ކަމަށެވެ.

މިއަދު ނެރުނު މި ލިސްޓާ ގުޅިގެން ގިނަ ކުލަބުތަކަކާއި، ޖަމިއްޔާތަކެއްގެ ކަންބޮޑުވުން ވަނީ ސޯޝަލް މީޑިއާއަށް ބަންޑުން ކޮށްލައިފައެވެ. އަދި އަހަރީ ރިޕޯޓާއެކު ހުށައަޅަން ޖެހޭ ލިޔެކިޔުންތައް ހުށައަޅާފައިވާނެ ކަމަށާއި، މި ލިސްޓު އޮތީ އަޕްޑޭޓް ނުކޮށް ކަމަށް ގިނަބަޔަކު ޝަކުވާތައް ވެސް ކުރިއެވެ.

އެއާ ގުޅިގެން މިނިސްޓާ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމަންޓް އަހުމަދު މަހްލޫފް ވިދާޅުވީ އެ ލިސްޓް އާއްމުކުރިކަން އެބޭފުޅާއަށް ވެސް ފެނިވަޑައިގަތީ ނޫސްތަކުން ކަމަށެވެ. "އޭގެތެރޭގައި ޖަމުޢިއްޔާތަކުގެ ރަޖިސްޓްރާގެ ދަށުގައި ނުހިމެނޭ ބައެއް ޤައުމީ ކުޅިވަރު އެސޯސިއޭޝަންތަކާއި ބައެއް ކުޅިވަރު ކްލަބްތައް ހިމެނޭ. އަދި ހަރަކާތްތެރިކޮށްފެންނަ ބައެއް ޖަމުޢިއްޔާތައްވެސް އެބަހިމެނޭ. މިކަމާއި ގުޅިގެން ބައެއް ފަރާތްތަކުގެ ކަންބޮޑުވުންވަނީ އަޅުގަނޑަށް ލިބިފަ." މަހްލޫފް ވިދާޅުވިއެވެ.

މަހްލޫފް އިތުރަށް ވިދާޅުވީ މިކަންކަން ބަލާ ރަނގަޅުކުރުމަށް ވާނީ ރިކުއެސްޓުކޮށްފައި ކަމަށެވެ.

އިންއެކްޓިވް ޖަމްއިއްޔާތަކުން ލިޔެކިޔުން ފުރިހަމަ ކުރުމަށްޓަކައި މިދިޔަ އަހަރު ޑިސެމްބަރު މަހުވެސް އިތުރު ފުރުސަތެއް ދީފައިވާކަން ފާހަގަކޮށް މިނިސްޓްރީން ބުނީ މިހާރު އާންމުކޮށްފައިވާ ލިސްޓްގައިވާ ޖަމްއިއްޔާތަަކަށް ސެޕްޓެމްބަރު 24، 2023 ވާ އަންގާރަ ދުވަހުގެ 14:00 އާއި ހަމައަށް އިތުރު ފުރުސަތެއް ދޭން ނިންމާފައިވާ ކަމަށެވެ. މިގޮތުން ޖަމްއިއްޔާއެއް އުވާލުން ހުއްޓުވައި ދިނުމަށް އެ ޖަމްއިއްޔާގެ މެންބަރަކަށް ނުވަތަ މަސްލަހަތު އޮތް ތިންވަނަ ފަރާތަކަށް ޖަމްއިއްޔާތަކުގެ ރަޖިސްޓަރާއަށް ލިޔުމުން ހުށަހެޅުމަށް މިނިސްޓްރީން ވަނީ އެދިފައެވެ،

ދިވެހިރާއްޖޭގައި ރަޖިސްޓަރީކޮށްގެން ހިންގަމުންދާ ޖަމްއިއްޔާ ތަކަކީ އެޖަމްއިއްޔާއެއް ނިސްބަތްވާ ރަށާއި، އަތޮޅަށް އަދި މުޅި ގައުމަށް ނުހަނު ފައިދާހުރި އަގުހުރި މަސައްކަތްތަކެއް ހިލޭސާބަހަށް ކުރަމުންގެންދާ ފަރާތްތަކެއްކަން މިނިސްޓްރީން ވަނީ ފާހަގަ ކޮށްފައެވެ.