އިޒްރޭލުގެ ޕާސްޕޯޓު މަނާކުރުމަކީ ރައީސްއަށް ކުރެވޭނެ ކަމެއް ނޫން: ސަރުކާރު

އިސްރާޢީލު ޕާސްޕޯޓު މަނާކުރުމަކީ ޤާނޫނީގޮތުން ރައީސް ޑރ. މުޙައްމަދު މުއިއްޒަށް ކުރެވޭނެ ކަމެށް ނޫން ކަމަށް ސަރުކާރުން ބުނެފިއެވެ.

އިޒްރޭލުގެ ޕާސްޕޯޓު މަނާ ކުރަން ރައީސްއަށް ލަފާ އަރުވަން މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނިންމީ އެ ކޮމިޓީގެ ހިމެނޭ މެންބަރުންގެ އިއްތިފާގުންނެވެ. އެގޮތަށް ނިންމީ، އިޒްރޭލު ޕާސްޕޯޓު މަނާ ކުރަން ގޮވާލާ މަޖިލީހުގެ އިދާރާ ކައިރި މުޒާހަރާ ކުރުމުން އެ މަޖިލީހުގެ މެންބަރު އަހުމަދު ހައިތަމް ހުށަހެޅި މައްސަލައަކާ ގުޅިގެންނެވެ.

އެގޮތުން މިއަދު އިސްރާއީލުގެ ނަމުގައި އޮންނަ ޕާސްޕޯޓު ރާއްޖޭން މަނާކުރުމާ ގުޅޭ ގޮތުން ރައީސް ޑރ. މުޙައްމަދު މުއިއްޒު ގެންގުޅުއްވާ ސްޓޭންޑަކީ ކޮބައިތޯ ނޫސްވެރިން ސުވާލުކުރުމުން، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލް ވިދާޅުވީ ވަރަށް ހައްސާސް މައްސަލައެއްގެ ގޮތުގައި ހާއްސަ އަހައްމިއްޔަތުކަމެއް ދީގެން ސަރުކާރުގެ ކަމާބެހޭ އިދާރާތަކުން އެކަމާ ގުޅޭ މަސައްކަތްތައް ކުރަމުން އަންނަ ކަމަށެވެ. 

Advertisement

ރައީސް ޑރ. މުއިއްޒުގެ ސްޓޭންޑެއް ސާފުކޮށް ވިދާޅުވުމުގެ ބަދަލުގައި، ފިރުޒުލްވަނީ އެއީ ރައީސް ޑރ. މުއިއްޒަށް ޤާނޫނީ ގޮތުން ލިބިދޭ ބާރެއް ނޫން ކަމަށް ތަކުރާރުކޮށް ވިދާޅުވެފައެވެ.

އިޒްރޭލު ޕާސްޕޯޓު މަނާ ކުރަން ރައީސުލްޖުމްހޫރިއްޔާއަށް ލަފާ އެރުވުމަށް ނިންމައި އެ ސިޓީ މަޖިލީހުން ފޮނުވީ، ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަހު، ނޮވެމްބަރު 16، ގައި ކަމަށް މަޖިލީހުން ބުނެ އެވެ.

ޑިސެމްބަރު 5، ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ އިޒްރޭލުގެ ޕާސްޕޯޓުގެ މައްސަލަ ކެބިނެޓާ ހަމައަށް ގެންނަވާނެ ކަމަށާއި އެ މައްސަލަ ދިރާސާ ކުރެއްވުމަށްފަހު އަޅުއްވަންޖެހޭ ފިޔަވަޅުތައް އަޅުއްވާނެ ކަމަށެވެ.

"ރައްޔިތުންގެ މަޖިލީހުހެ ގަރާރެއް، އަޅުގަނޑަށް ދާދި ދެންމެ އަކު މައުލޫމާތު ލިބުނީ އޭޖީ އޮފީހަށް ރައްޔިތުންގެ މަޖިލީހުން ނިންމާފަ އޮތް ގަރާރެއް އެބަ އޮތޭ އައިސްފަ، އެހެންވީމަ އެ ގަރާރު ދިރާސާކޮށްފަ، އަޅުގަނޑުމެންނަށް މަޖުބޫރުވާ ކަމެއް ނުވަތަ ކުރަންޖެހޭ ކަމެއް ވެއްޖިއްޔާ ވަގުތުން ފިޔަވަޅު އަޅާނަން،" ރައީސް ވިދާޅުވި އެވެ.

ރައީސްގެ އެ ވާހަކަފުޅަށް ހަފްތާއެއް ވެގެން ދިޔައިރު، މިއަދު "އަދަދު" ނޫހުން ރައީސް އޮފީހުގެ ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ނޮވެމްބަރު 16، ގައި ރައީސް އޮފީހަށް ފޮނުވި ސިޓީއާ ގުޅޭ ގޮތުން ސުވާލު ކުރުމުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ މިވަގުތު ތި ސުވާލަށް އަރުވާނެ ވަކި ޖަވާބެއް ނެތް ކަމަށެވެ.