އިރާންގެ ރައީސް އަވަހާރަވުމުގެ ހިތާމައިގައި ގައުމީ ދިދަ ބައިދަނޑިއަށް ތިރިކުރުމަށް ނިންމަވައިފި

އީރާނުގެ ރައީސް ޑޮކްޓަރ ސައްޔިދު އިބްރާހީމް ރައީސީ އަވަހާރަވުމުގެ ހިތާމައިގައި ތިން ދުވަސް ވަންދެން ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ހަމަޖައްސަވައިފިއެވެ.

ރައީސް އޮފީހުން މިއަދު ހާމަކުރި ގޮތުގައި މެއި 21 ވާ އަންގާރަ ދުވަހުން ފެށިގެން މެއި 23 ވާ ބުރާސްފަތި ދުވަހުގެ ނިޔަލަށް ގައުމީ ދިދަ ބައިދަނޑިއަށް ތިރިކުރެއްވުމަށް ރައީސް ނިންމަވާފައިވެއެވެ. 

ރައިސީ އަވަހާރަވިކަން އިރާނުން ހާމަކުރީ އޭނާ ދަތުރުކުރެއްވި ހެލިކޮޕްޓަރާ ގުޅުން ކެނޑުނުތާ ދިހަ ގަޑިއިރަށްވުރެ ވެސް ގިނައިރުވީ ފަހުންނެވެ. ރައިސީއާއެކު އެގައުމުގެ ހާރިޖީ ވަޒީރު  ހުސައިން އަމީރު އަބްދުﷲ ހިޔާންއާ، އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކް ރަހުމަތީ އަދި ތަބްރީޒް މިސްކިތުގެ އިމާމް އާޔަތުالله އަލްހާޝިމީވެސް އަވަހާރަވެފައިވާކަމަށް އިރާންގެ ހަބަރުފަތުރާ ވަސީލަތްތަކުން ހާމަކޮށްފައިވެއެވެ. 

Advertisement

ރައިސީ ދަތުރުކުރެއްވި ހެލިކޮޕްޓަރު ވެއްޓިފައިވާ ސަރަހައްދުކަމަށް ރިޕޯޓްކޮށްފައި ވަނީ ފަރުބަދަ މަތީގެ ސަރަހައްދަކަށެވެ. 

ރައިސީ އަވަހާރަވިކަން ރަސްމީކޮށް އިއުލާންކޮށް ނައިބުރައީސްގެ މަގާމުގައި ހުންނެވި މުހައްމަދު މޮޚްބެރުއާ އެގައުމުގެ ރައީސްކަން މިހާރު ވަނީ ހަވާލުކޮށްފައެވެ.