އިދިކޮޅު ބަދުނާމުކުރަން ސަރުކާރުން ހަމަލާ ދިނުމަށް ރާވާކަމަށް ބުނާ ޚަބަރުގެ އަސާސެއް ނުދެއްކުނު

Idhikolhu badhunaamu kuran sarukaarun hamalaa dhinumah raavaa kamah bunaa khabaru ge asaaseh nudhekkunu

ފުލުހުންގެ އިދާރާ

14 ސެޕްޓެންބަރު 2023

އިދިކޮޅު ބަދުނާމުކުރަން ސަރުކާރުން ހަމަލާ ދިނުމަށް ރާވާކަމަށް ބުނާ ޚަބަރުގެ އަސާސެއް ދެއްކިފައިނުވާކަމަށް ފުލުހުންގެ ޚިދުމަތުން ބުނެފިއެވެ.

އޮންލައިން ނޫހެއްގައި ޝާއިއުކުރި ޚަބަރެއްގައި އިދިކޮޅު ބަދުނާމުކުރަން އެމްޑީޕީ މެމްބަރުންނަށާއި ބައެއް ބިދޭސީންނަށް ސަރުކާރުން ހަމަލާ ދިނުމަށް ރާވާކަމަށް ވަނީ ބުނެފައެވެ. ޚަބަރުގައިވާ ގޮތުން އެކަންކުރުމަށް ޖިސްމާނީ ބޮޑެތި އަނިޔާތަކެއް ދީ، ފުރާނައަށް ނުރައްކާވާފަދަ ހަމަލާތައް ދިނުމަށް ވަނީ ނިންމާފައެވެ. އަދި އެއަށްފަހު އެއަމަލު ހަރުކަށި ފިކުރާއި ގުޅުވުމަށް ނިންމާފައިވާކަމަށް ޚަބަރުގައިވެއެވެ.

މިކަމާއި ގުޅިގެން ފުލުހުން ބުނީ ސަރުކާރުގެ ނުވަތަ ދައުލަތުގެ މުވައްޒަފުންނާއި ރާއްޖޭގައި އުޅޭ ބޭރުގައުމުތަކުގެ ރައްޔިތުންނަށް އަމާޒުކޮށްގެން ހަމަލާދިނުމަށް އެއްވެސް ފަރާތަކުން ރާވައިފައިވާކަމުގެ އެއްވެސް މައުލޫމާތެއް ފުލުހުން ނުވަތަ އެނޫންވެސް ސަލާމަތީ ޚިދުމަތަކަށް ލިބިފައިނުވާ ކަމަށެވެ.

"މިމައުލޫމާތު ސޯޝަލް މީޑިޔާގައި އާންމުކުރި ފަރާތުން މިއީ އެއްވެސް އަސާސެއްގެ މައްޗަށް ބިނާކޮށް ފެތުރި މައުލޫމާތެއްތޯ ސާފުކުރުމަށް ސުވާލުކުރުމުން މިފަދަ މައުލޫމާތެއް ލިބިފައިވާކަމަށްބުނުން ފިޔަވައި މިއީ ސައްހަ އަސާސެއްގެ މައްޗަށް ބިނާކޮށް ފެތުރި މައުލޫމަތެއްކަމަށް ބުރަވެވޭފަދަ އެއްވެސް ހަރުދަނާ ސަބަބެއް ބަޔާންކޮށްފައިނުވޭ"

މީގެ އިތުރުން، މިމައުލޫމާތު ލިބުނު ފަރާތެއް ހިއްސާކުރުމަށް އެފަރާތުން އުޒުރުވެރިވެފައިވާއިރު މިމައުލޫމާތު ފެތުރި ގޮތާއި ސަލާމަތީ ޚިދުމަތްތަކުގެ މައުލޫމާތާއި އިންޓެލިޖެންސްއަށް ބަލާއިރު މިއީ އެއްވެސް އަސާސެއް ނެތި ފަތުރާފައިވާ ޚަބަރެއްކަމަށް ފުލުހުން ބުނެއެވެ. އަދި މިއީ ރައްޔިތުންގެ ތެރޭގައި ހާސްކަމާއި ބިރުވެރިކަން އުފައްދައި ސިޔާސީ މަގްސަދެއް ހާސިލްކުރުމަށްޓަކައި ފެތުރި އަސްލެއް ނެތް ވާހަކައެއް ކަމަށް ބެލެވޭކަމަށް ފުލުހުން ބުނެއެވެ.

ފުލުހުން ވަނީ މިބާވަތުގެ ދޮގު ޚަބަރުތައް ފަތުރައި ރައްޔިތުންގެ ތެރޭވައި ބިރުވެރިކަމާއި ނުތަނަވަސްކަން ނުފެތުރުމަށާއި ގައުމީ މަސްލަތަހަަތަށް އުނިކަން ލިބޭ ފަދަ ކަންކަން ނުކުރުމަށް އިލްތިމާސްކޮށްފައެވެ.