އައިހެވަން ޕްރޮޖެކްޓް އަލުން ފަށަންޖެހޭ، އެއީ މި ސަރުކާރުގެ ބޮޑު އަޒުމެއް: މިނިސްޓަރ ސައީދު

ޜައީސް ޑރ. މުހައްމަދު މުއިއްޒުގެ ސަރުކާރުން ކުރިން ރައީސް އަބްދުﷲ ޔާމީން އަބްދުލްޣައްޔޫމްގެ ސަރުކާރުގައި ހުއްޓުނު އައިހެވަން ޕްރޮޖެކްޓް އަލުން ފަށާނެ ކަމަށާއި އިހަވަންދިއްޕޮޅު މަޝްރޫއު ގެންދިއުމަށް ވަރުގަދަ އަޒުމެއް އެބައޮތް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

މިއަދު މަޖިލީހުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ސައީދު ވިދާޅުވީ، އިހަވަންދިއްޕޮޅު ޕްރޮޖެކްޓް ކުރިއަށް ގެންދިއުމަކީ އާ ސަރުކާރުން ވަރަށް ބޮޑު އިސްކަމެއް ދޭނެ ޕްރޮޖެކްޓެއް ކަމަށެވެ. އެތަނުގައި ބަންކަރިން ހިދުމަތް، ނުވަތަ ޓްރާންސްޝިޕްމަންޓް ހިދުމަތް ދިނުމާ މެދު ގޮތް ނިންމާނީ އެ ޕްރޮޖެކްޓަށް އިންވެސްޓް ކުރާ ބަޔަކު ކަމަށް ވެސް އޭނާ ވިދާޅުވި އެވެ.

އިހަވަންދިއްޕޮޅަކީ ބޭރުގެ ގިނަ އަދަދެއްގެ އުޅަނދުތައް ދަތުރުކުރާ ސަރަހައްދެކެވެ. އެ ސަރަހައްދުގައި ކަނޑުއުޅަނދުފަހަރާ ގުޅުންހުރި ވިޔަފާރިތައް ހިންގޭ ގޮތަށް، ޒަމާނީ ބަނދަރެއް އަޅަން ކުރީގެ ރައީސް ޢަބްދުﷲ ޔާމީން ޢަބްދުލްގައްޔޫމްގެ ސަރުކާރުން އިއުލާންކުރި ނަމަވެސް، އެ މަޝްރޫއު ހިންގިފައިނުވެއެވެ. ނިމުނު އެމްޑީޕީ ސަރުކާރުގައި ވެސް އެ މަޝްރޫއު ހިންގަން ތަފާތު ތާރީޚުތައް ދެއްވި ނަމަވެސް މަޝްރޫއު ކުރިއަކަށް ނުގެންދެއެވެ.

Advertisement

"މިފަދަ މަޝްރޫއުއެއް ކުރިއަށް ގެންދާނަން. ބަންކަރިން ހިދުމަތަކީ ދޭން ޖެހޭ ހިދުމަތެއް. ބަންކަރިން އެކަންޏެއް ނޫން އެހެން ހިދުމަތްތައް ވެސް ދޭން މިތިބީ ތައްޔާރު،" އޭނާ ވިދާޅުވި އެވެ.

ސައީދު ވިދާޅުވީ، އިހަވަންދިއްޕޮޅު ތަރައްގީ ކުރުމުގެ މަޝްރޫއު ހުއްޓާލުމުގެ ވިސްނުމެއް ނުގެންގުޅުއްވާ ކަމަށެވެ.

"އިހަވަންދިއްޕޮޅުގެ މަސައްކަތް ވެސް އަދި ރާއްޖޭގެ އެހެން ސަރަހައްދުތަކުގައި ވެސް ބޯޓު ފަހަރަށް ހިދުމަތް ދިނުމުގެ މަސައްކަތް ކުރިއަށް ގެންދާނެ ވާހަކަ ތަކުރާރުކޮށް ދަންނަވަން. އަދި 1993 ވަނަ އަހަރު ވެސް ބަނދަރުގެ މަސައްކަތާއި ބަންކަރިން ވާހަކަތައް ދެކެވިފައި ހުންނާނީ. އެކަމަކު ބްރޭންޑްކުރެވިގެން އައިހެވެންގެ ނަން އައިސްފައިވާނީ 2014 ވަނަ އަހަރު،" އޭނާ ވިދާޅުވި އެވެ.

ކުރީގެ ރައީސް ޔާމީންގެ ސަރުކާރުން "އައިހެވަން"ގެެ ނަމުގައި އިހަވަންދިއްޕޮޅުގައި އިންޓަގްރޭޓޭޑް ޕްރޮޖެކްޓެއް ހިންގަން އިއުލާނުކޮށްފައި ވަނީ ބަނދަރަކާއި އެއާޕޯޓަކާއި ބަންކަރިންގެ ޚިދުމަތާއި ޝޮޕިން މޯލްތަކުގެ އިތުރުން ރިއަލް އެސްޓޭޓާއި ޓޫރިސްޓު ރިސޯޓު ތަރައްގީކުރާ ގޮތަށެވެ. އެކަމަކު، މިއަދާ ހަމައަށް ވެސް އެ މަޝްރޫއު ކުރިއަށް ގެންދެވިފައެއް ނުވެއެވެ.

"އިހަވަންދިއްޕޮޅުގައި އަޅަން ގަސްތުކުރާ ޕޯޓެއް ލާމު އަތޮޅަކަށް ބަދަލެއް ނުކުރޭ. ރައީސް ޑރ. މުހައްމަދު މުއިއްޒުގެ ވައުދަކީ އިހަވަންދިއްޕޮޅުގައި ވެސް ޕޯޓު ގާއިމުކޮށް، އަދި އެ ތާގައި ކުރެވޭނެ އިންޑަސްޓްރިއަލް މަސައްކަތްތައް ކުރުމާ އެކުގައި ހަމަ ލާމު އަތޮޅުގައި ވެސް ބަނދަރެއް ގާއިމުކުރުން،" ސައީދު ވިދާޅުވިއެވެ.