ހިޔާ ފްލެޓުގެ ކުލިން 2 ލައްކަ އުނިކޮށް، ރައީސް މުއިއްޒުގެ ރިޔާސީ ވައުދު ފުއްދަވައިފި

ހިޔާ ފްލެޓްގެ ކުލި ހަތް އަހަރުގެ މުއްދަތަށް ކުޑަކޮށް ކުލިން ދައްކަން ޖެހޭ 2 ލައްކަ ސަރުކާރުން މިއަދު ނިންމައިފި އެވެ.

ރައީސް އޮފީހުގައި މިހާރު ކުރިއަށް ދާ ނޫސްވެރިންގެ ބައްދަލުވުމުގައ ރައީސް ޑރ. މުހައްމަދު މުއިއްޒު ވިދާޅުވީ ހިޔާ ފްލެޓްތަކުގެ ފިނިޝިން އަށް، ފްލެޓް ލިބުނު ފަރާތްތަކުން ކުރި ހަރަދުން 200،000ރ. އުނިކުރުމަށް ހިޔާ ފްލެޓްގެ ކުލި ހަތް އަހަރަށް ކުޑަކުރަން ވަޒީރުންގެ މަޖިލީހުން މިއަދު ނިންމާފައިވާ ކަމަށެވެ.

މިގޮތަށް ހަމަޖެއްސުމުން ކުރިއަށް އޮތް ހަތް އަހަރު ހިޔާ ފްލެޓްގެ މަހު ކުއްޔަށް ދައްކަން ޖެހޭނީ 3،900ރ. ކަމަށް ރައީސް ވިދާޅުވި އެވެ. މީގެ އިތުރުން ވިނަރެސްގެ ފްލެޓްތަކުގެ ޑައުންޕޭމަންޓާއި މަހު ކުލި ވެސް ކުޑަކުރަން ނިންމާފައިވާ ކަމަށް އެމަނިކުފާނު ވިދާޅުވި އެވެ.

Advertisement

މީގެ އިތުރުން ރަށްރަށުގައި އަޅާފައި ހުރި ހައުސިން ޔުނިޓްތަކުގެ ކުލި 3،300ރ. އަށް ކުޑަކުރަން ވެސް ވަނީ ނިންމައިފަ އެވެ. ހިޔާ ފްލެޓްތައް ހަދަން ހޭދަކުރި ފައިސާ އަނބުރާ ދިނުމާއި އެހެން ފްލެޓްތަކުގެ އަގު ކުޑަކޮށް ދިނުމަކީ ރައީސް މުއިއްޒުގެ ރިޔާސީ ވައުދެކެވެ. މިއީ ރައީސް މުއިއްޒުގެ ރިޔާސީ ބޮޑެތި ވައުދުތަކުގެ ތެރެއިން މިހާތަނަށް ފުއްދި ފުރަތަމަ ވައުދެވެ. މީގެ އިތުރުން އިންޑިއާ ސިފައިން ރާއްޖެއިން ބޭލުމަށް ވެފައިވާ ވައުދު ފުއްދުމަށް، އެގައުމާއެކު މަޝްވަރާކޮށް، އިންޑިއާގެ ސިފައިން ގެންދަން އެއްބަސްވެފައިވާ ކަމަށްވެސް ރައީސް މުއިއްޒު ވަނީ މިފަހުން ވިދާޅުވެފައެވެ.