ހިރިމަރަދޫ ރައްޔިތުން ހަނިމާދޫއަށް ބަދަލު ކުރަން ސަރުކާރުން ނިންމައިފި

ހިރިމަރަދޫ ރައްޔިތުން ހަނިމާދޫއަށް ބަދަލު ކުރަން ސަރުކާރުން ނިންމައިފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވީ ހިރިމަރަދޫ ރައްޔިތުން ހަނިމާދޫއަށް ބަދަލު ކުރަން ސަރުކާރުން ނިންމާފައިވާ ކަމަށާއި، އެއީ ހިރިމަރަދޫ ރައްޔިތުން ވެސް ބޭނުންވާ ގޮތް ކަމަށެވެ. 

"ހދ. ހިރިމަރަދޫ ރައްޔިތުން އެދިވަޑައިގަތްގޮތަށް، އެރަށު ރައްޔިތުން ހދ. ހަނިމާދޫއަށް ބަދަލުކުރުމަށް ސަރުކާރުން ނިންމަވައިފި." ހީނާ މިއަދު ސޯޝަލް މީޑިއާ ޕްލެޓްފޯމްތަކުގައި ވިދާޅުވިއެވެ.

Advertisement

ހދ. ހިރިމަރަދޫ ރައްޔިތުން ކ. ތުލުސްދުއަށް ބަދަލުކޮށްދޭން އެ ރަށު ކައުންސިލުން ލޯކަލް ގަވަރުމަންޓް މިނިސްޓްރީގައި މިދިޔަ އަހަރުވަނީ އެދިފައެވެ.

ލޯކަލް ގަވަނަންސް މިނިސްޓަރު އާދަމް ޝަރީފް އުމަރު ކުރިން އެކްސްގައި ކުރެއްވި ޕޯސްޓެއްގައި ވިދާޅުވީ، ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވާން ރައްޔިތުން ނިންމާފައިވާ ކަމަށް ބައްދަލުވުމުގައި އެ ރަށު ކައުންސިލްގެ މެންބަރުން ވިދާޅުވި ކަމަށެވެ.

އަދި، އެ ރަށުގެ ރައްޔިތުން ބަދަލުވާން ބޭނުންވަނީ ކ. ތުލުސްދުއަށް ކަމަށް މިނިސްޓަރު ވަނީ ހާމަކުރައްވައިފައެވެ.

ހިރިމަރަދޫގެ އާބާދީއަކީ 589 އެވެ. އެހެން ނަމަވެސް އެ ރަށު ރައްޔިތުންގެ ތެރެއިން ގިނަ ބަޔަކު ވަނީ ރަށް ދޫކޮށް ހިޖުރަކޮށްފައެވެ.