ޤަތުލުކުރުމަށްވުރެ ފިތުނަވެރިކަމުގެ ނުބައިކަން ބޮޑު: ޚުތުބާ

Gathulu kurumahvure fithuna verikamuge nubaikan bodu: Khuthuba

ފިތުނަ އުފެއްދުމުން ދުރުވުމަށް މިއަދުގެ ޚުތުބާގައި ނަސޭހަތްތެރިވެފައިވޭ

15 ސެޕްޓެންބަރު 2023

ޤަތުލުކުރުމަށްވުރެ ފިތުނަވެރިކަމުގެ ނުބައިކަން ބޮޑުކަން ފާހަގަކޮށް މުޖުތަމައުގައި ފިތުނަ އުފެއްދުމުން ދުރުވުމަށް މިއަދުގެ ޚުތުބާގައި ނަސޭހަތްތެރިވެއްޖެއެވެ.

ދޮގު ވާހަކަ ދެއްކުމާއި ދޮގު ޚަބަރު ފެތުރުމުގެ ނުބައިކަމަށް އަލިއަޅުވާލައި މިއަދު އިއްވި ޚުތުބާގައި ދޮގު ވާހަކަތައް ފެތުރުމަކީ މީސްތަކުންނަށް ހައްގު އޮޅުވާލާނެކަމެއްކަން ވަނީ ފާހަގަކުރައްވާފައެވެ.

އެކަމަކީ މީސްތަކުން ހަމަ މަގުން އެއްކިބާ ކުރުވާކަމެއްކަމަށާއި އެކަމުގެ ނުބައިކަން މީހުން މެރުމަށްވުތެ ބޮޑުކަމަށް ޚުތުބާގައި ބުނެފައިވެއެވެ. މީހަކު މެރުމަށްވުރެ ފިތުނަވެރިކަން ނުބައިވަނީ ގަތުލުގެ ސަބަބުން ހަމައެކަނި އެފަރުދަށް ނުވަތަ އާއިލާއަށް ގެއްލުންވިނަމަވެސް، ފިތުނައިގެ ސަބަބުން މުޅި މުޖުތަމައުއަށް ގެއްލުން ލިބޭތީކަަމަށް ޚުތުބާގައި ފާހަގަކުރިއެވެ.

ޚުތުބާގައި މުސްލިމުންގެ ސިއްރުތައް ބޭޒާރުކޮށް، އަބުރު ނަގައިލުމަކީ އިސްލާމްދީން ހަރާމްކަމެއްކަން ފާހަގަކުރެއްވިއެވެ. އޭގެ ސަބަބުން މުޖުތަމައު ހަލާކުވެ، މީސްތަކުންގެ މެދުގައި ފަސާދަ އާންމުވާކަމަށް ޚުތުބާގައި ފާހަގަކޮށްފައިވެއެވެ.

"ޢިއްފަތްތެރި އަންހެނުންނަށް ޤަޛްފުކުރާ މީހުން (އެކަމުގެ މައްޗަށް) ހަތަރު ހެކިން ނުގެނައިނަމަ، ފަހެ އެއުރެންގެ ގައިގައި އަށްޑިހަ އެތިފަހަރުން (ޙައްދު) ޖަހާށެވެ! އަދި ދުވަހަކުވެސް އެއުރެންގެ ހެކި ބަހެއް ތިޔަބައިމީހުން ޤަބޫލުނުކުރާށެވެ! އަދި އެއުރެންނީ ހަމަ ފާސިޤުންނެވެ"

ޚުތުބާގައި ދޮގު ވާހަކަތައް ފަތުރާ މީހުންނަށް ޤުރްއާންގައި ދެއްވާފައިވާ ނަމަކީ "މުޖްރިފުން"ކަމުގައި ބުނެފައިވެއެވެ. އެއީ މީސްތަކުންގެ މެދުގައި ގަޑުބަޑު އުފައްދާ މީހުންގެ ގޮތުގައި ސިފަކޮށްފައިވެއެވެ.

ދޮގު ޚަބަރު ފެތުރުމަކީ ދެބައޮޑުވާ މީހުންގެ ސިފައެއްކަން ޚުތުބާގައި ފާހަގަކުރިއެވެ. އެފަދަ މީހެއްގެ އަމާޒަކީ މުޖުތަމައުގެ އަމާންކަން ނަގައިލުންކަމަށާއި އެއީ ދީނުގެ ހައްގުގައިވެސް ޖަރީމާއެއްކަމަށާއި އެކަމަށް ސަމާލުވުމަށް ޚުތުބާގައި ނަސޭހަތްތެރިވެފައިވެއެވެ.