ހުރިހާ ސިފައިން ގެންދަން އިންޑިއާ އިން އެއްބަސްވެއްޖެ

ރާއްޖޭގައި ތިބި ކަމަށް ބުނާ އިންޑިއާ ސިފައިން އަނބުރާ ގައުމަށް ގެންދަން އިންޑިއާ އިން މިއަދު އެއްބަސްވެއްޖެ އެވެ.

އިންޑިއާ އިން މިކަމަށް އެއްބަސްވީ އިންޑިއާ ސިފައިން ފޮނުވާލުމާ ބެހޭގޮތުން މަޝްވަރާކުރުމަށް އެކުލަވާލާފައިވާ ހައި ލެވެލް ކޯ ގްރޫޕުގެ ދެވަނަ ބައްދަލުވުމުގަ އެވެ. މި ބައްދަލުވުން ބާއްވާފައިވަނީ އިންޑިއާގެ ވެރިރަށް ނިއުދިއްލީގަ އެވެ.

މި ބައްދަލުވުމަށްފަހު އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުނީ އިންޑިއާ ސިފައިންގެ ފުރަތަމަ ބެޗު އަންނަ މަހުގެ 10 ގައި ރާއްޖެ އިން އަނބުރާ ގައުމަށް އަންނާނެ ކަމަށާއި އަދި ދެން ތިބި ފަރާތްތައް މިއަހަރުގެ މޭ މަހުގެ 10 ގައި އަނބުރާ ގައުމަށް އަންނާނެ ކަމަށެވެ.

Advertisement

މި ބައްދަލުވުމުގައި ރާއްޖެ އާއި އިންޑިއާއާ ދެމެދު ތަފާތު އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ވެސް މަޝްވަރާ ކުރެވުނު ކަމަށް އެ ބަޔާނުގައިވެ އެވެ. އަދި ހައި ލެވެލް ކޯ ގްރޫޕްގެ ތިންވަނަ ބައްދަލުވުން މާލޭގައި ބޭއްވުމަށް ވެސް މިއަދުގެ ބައްދަލުވުމުގައި ނިންމާފައިވާ ކަމަށް ބުނެފައިވެ އެވެ.

ރާއްޖޭގައި ތިބި އިންޑިއާގެ ސިފައިން އަންނަ މާޗު މަހުގެ 15 ގެ ކުރިން އަނބުރާ ގެންދަން ރައީސް ޑރ. މުހައްމަދު މުއިއްޒު ވަނީ އެދިވަޑައިގެންފަ އެވެ.