ބަކާ ނިޔާވުމުން ރައީސް މުއިއްޒު ތައުޒިޔާ ވިދާޅުވެއްޖެ

މަޝްހޫރު ފުޓުބޯޅަ ކުޅުންތެރިޔާ މުހައްމަދު އާރިފް (ބަކާ) ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.

ހައްޖުގެ އަޅުކަން އަދާ ކުރުމަށް ފަހު ރާއްޖެ އައިސް އޭނާ ދިޔައީ ސިއްހީ ހާލަތު ދަށް ވުމުގެ ސަބަބުން އޭޑީކޭގެ އައިސީޔޫގައި ފަރުވާ ހޯދަމުންނެވެ. އޭނާގެ ހާލަތު ގޯސްވަމުން ދިޔައީ ގަދަ ހުމެއްގެ ސަބަބުންކަމަށް މައުލޫމާތު ލިބެ އެވެ. 

އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ރާއްޖޭގެ ކުޅިވަރު ކުރިއެރުވުމަށް މުހިންމު ހިދުމަތްތަކެއް ކޮށްފައިވާ ބަކާ ނިޔާވުމަކީ ލިބުނު ފުން ހިތާމައެއް ކަމަށެވެ. 

Advertisement

"ދިވެހިރާއްޖޭގައި ކުޅިވަރު ކުރިއެރުވުމަށް ވަކީން ހާއްސަކޮށް ފުޓްބޯޅައަށް ގިނަގުނަ ހިދުމަތްތަކެއް ކޮށްދެއްވައި، ގައުމަށް ފަހުރުވެރި ނަން ހޯއްދަވައިދެއްވާފައިވާ ހުނަރުވެރި ކުޅުންތެރިޔާ މުޙައްމަދު ޢާރިފް (ބަކާ) ނިޔާވުމަކީ ދިވެހި ހުރިހާ ރައްޔިތުންނަށް ލިބުނު ފުން ހިތާމައެއް،" ރައީސް ލިޔުއްވާފައިވެ އެވެ.

ރައީސްގެ އިތުރުން ސަރުކާރުގެ އިސް ބޭފުޅުންނާއި އެނޫންވެސް ގިނަ ބަޔަކު އަންނަަނީ ތައުޒިޔާ ފޮނުވަމުންނެވެ.

ރާއްޖެ އާއި ސްރީ ލަންކާގައި 2008 ގައި ބޭއްވި ސާޗް ޗެމްޕިއަންޝިޕްގެ ތަށި ރާއްޖެ އަށް ހޯދައި ދިނުމުގައި އޭނާ މުހިންމު ދައުރެއް އަދާ ކުރި އެވެ. މިޔަންމާގެ ލީގުގައި ވެސް ކުޅުނު ބަކާ، އެއްވަނަ ޑިވިޝަނުގައި އެންމެ ފަހުން ކުޅުނީ ޔުނައިޓެޑް ވިކްޓަރީ އަށެވެ.

ފުޓްބޯޅައިގެ ތަޖުރިބާކާރުން ބުނާ ގޮތުގައި، ބަކާ ރާއްޖޭގައި އުފެދުނު އެންމެ މޮޅު ޑިފެންސިވް މިޑްފީލްޑަރެވެ. ސ. ހިތަދު އަށް އުފަން ބަކާ، އުމުރުން 19 އަހަރުގައި އޭނާގެ ކެރިއަރު ފެށީ އައްޑޫ ވިޔަފާރިވެރިންތަކެއް ހިންގި ކުރީގެ ކްލަބް އައިއެފްސީން 2004 ގަ އެވެ.

އޭނާ ނިޔާވިއިރު އުމުރަކީ 38 އަހަރެވެ.