އަންނަ މަހު ކެނދިކުޅުދޫއިން އެއްގަމު ލައިސެންސް ދޫކުރަން ފަށަނީ

މިއަންނަ މަހުގެ އެއްވަނަ ދުވަހުން ފެށިގެން ނ. ކެނދިކުޅުދޫއިން އެއްގަމު އުޅަނދުގެ ލައިސެންސް ދޫކުރަން ފަށަން ނިންމައިފިއެވެ.

ކެނދިކުޅުދޫގެ ރައްޔިތުން ދުވަސްތަކެއް ވަންދެން ދެކެމުން އައި ހުވަފެނެއް ކަމަށްވާ ލައިސަންސް ރަށުން ނެގޭނެ އިންތިޒާމު އަންނަ މަހުން ފެށިގެން ހަމަޖެހިފައިވާކަން ގެޒެޓް އިއުލާނުގައި މިއަދު ވަނީ ޝާއިއު ކޮށްފައެވެ. އެއާއެކު އެކުލަވާލާފައިވާ އުސޫލާއި އެއްގޮތްވާގޮތުގެ މަތިން ކެނދިކުޅުދޫ ކައުންސިލުން އެއްގަމު އުޅަނދުގެ ލައިސެންސް ހެއްދުމުގެ ޚިދުމަތް ދެމުން ގެންދާނެ އެވެ.

މި ނޫހަށް މައުލޫމާތު ދެމުން ކެނދިކުޅުދޫ ކައުންސިލްގެ މުވައްޒަފަކު ވިދާޅުވީ ހުރިހާ ބާވަތެއްގެ އެއްގަމު އުޅަނދުގެ ލައިސެންސް ނެގޭނެ ގޮތަށް ލައިސެންސް ޓްރެކް ހަދާފައިވާ ކަމަށާއި، މިވަގުތަށް ދޫކުރަން ހަމަޖެހިފައިވަނީ ސައިކަލް، ކާރު އަދި ޕިކަޕު ކަމަށެވެ.

Advertisement

މި ޕްރޮޖެކްޓްގެ ކޮންސްޓްރަކްޝަން މަސައްކަތަށް ގައިގަނޑަކަށް 7 ލައްކަ ރުފިޔާ ކައުންސިލުގެ ބަޖެޓުން ޙަރަދުކޮށްފައިވާއިރު، އާލަތްތައް ހޯދައި އިންސްޓޯލް ކުރުމަށް އިތުރު 2 ލައްކަ ވަނީ ޙަރަދުވެފައެވެ. އަދި ލައިސެންސް ނެގުމުގެ ކަންކަން ފަސޭހަކަމާއެކު ކުރުމަށް ކައުންސިލްގެ ސްޓާފުން ވަނީ އެކަމަށް ތައްޔާރުކޮށް، އަހުލުވެރިކޮށްފައެވެ.

ކެނދިކުޅުދޫއިން އެއްގަމު އުޅަނދު ދުއްވުމުގެ ލައިސެންސް ދިނުމުގެ ހިދުމަތް ދޭން ފެށުމުގެ އެންމެ ފަހުގެ ތައްޔާރީތައް މިހާރު ވަމުން އަންނަ އިރު އެ ރަށު ކައުންސިލުން މިފަހުން ވަނީ ލައިސެންސް ޓުރެކު ސަރަހައްދުން ކެފޭ ރެސްޓޯރެންޓް ހިންގުމަށް ބިން ކުއްޔަށް ދިނުމަށް ވެސް ހުޅުވާލައިފައެވެ. އެގޮތުން ކުއްޔަށް ދޫކުރުމަށް ކަނޑައަޅާފައިވާ ބިމަކީ، ރެސްޓޯރެންޓް، ކެފޭ، ޓޭކް-އަވޭ، އަދި ޓަކް ޝޮޕް ފަދަ ވިޔަފާރިތަކަށް ދޫކުރާ ބިމެއް ކަމަށް އެކައުންސިލުން ބުނެއެވެ.

އެގޮތުން އެކަމަށް ދޫކުރާ ބިމަކީ ލައިސެންސް ޓްރެކްގެ އެތެރެއިން ދެކުނަށް، ކެނދިކޮޅު އަވަށު ފުޓުބޯޅަ ދަނޑުގެ އުތުރާ ދިމާލުން އޮންނަ ސަރަހައްދުން ދޫކުރާ 3،336.00 އަކަފޫޓުގެ ބިމެކެވެ. މި ބިމަށް ކުރިމަތިލުމަށް ހުޅުވާލާފައިވާ ފުރުސަތު މިހާރު އޮތީ ނިމިފައެވެ.