އަންނަ މަހު އިންތިހާބު ބޭއްވުމަށް، އިލެކްޝަނުން ކައުންޓް ޑައުން ފަށައިފި

ރައްޔިތުންގެ މަޖިލީސް 2024ގެ އިންތިޙާބް ރޯދަމަހުގެ ފަހު ބޭއްވުމަށް މަޖިލީހުން ފާސްކޮށްފައިވަނިކޮށް އިލެކްޝަންސް ކޮމިޝަނުން އަންނަ މަހު ވޯޓުލުން ބާއްވާ ގޮތަށް ކައުންޓް ޑައުން ފަށައިފި އެވެ.

17 މާޗް 2024ގައި ރައްޔިތުން މަޖިލީހުގެ އިންތިޙާބް ބޭއްވުމަށް ތާވަލްކުރެވިފައިވީ ނަމަވެސް އާންމު ރައްޔިތުންނަށް އުނދަގޫތަކެއް ވާނެތީ އާއި، ރޯދަ މަހެއްގައި އިންތިހާބެއް ބޭއްވުމުން ވޯޓާސް ޓާންއައުޓް ދަށްވާނެކަމަށް ބެލެވޭތީ ސިޔާސީ ޕާޓީތަކުން ހުށަހެޅި ޝަކުވާތަކަށް ބަލައި މަޖިލީހުން ގާނޫނަށް އިސްލާހު ގެނައެވެ.

މަޖިލީހުން އިސްލާހު ކުރެވުނު ބިލް ރައީސުލް ޖުމްހޫރިއްޔާއަށް ތަސްދީގު ކުރުމަށް ވަނީ ފޮނުވާފައެވެ. ނަމަވަސް މިހާތަނަށް އެމަނިކުފާނު ބިލު ތަސްދީގު ކުރައްވާފައި ނުވެ އެވެ. އަދި މަޖިލީހުގައި ޕީޕީއެމް/ޕީއެންސީ މެމްބަރުން ވޯޓު ދިނީ އިންތިހާބު ފަސް ކުރުމާ ދެކޮޅަށެވެ. މިހާރު ރައީސް ޑރ. މުހައްމަދު މުއިއްޒު ވެސް ވިދާޅުވަމުން ގެންދަވަނީ، އިންތިހާބު އޮންނާނީ އަންނަ މަހު ކަމަށެވެ. އެ މައްސަލައިގައި ޕާލިމަންޓު ގުރޫޕު ނޫސްވެރިންގެ ބައްދަލުވުމެއް ބޭއްވުމަށް ފަހު އެމްޑީޕީން ބުނީ އިންތިހާބު ފަސްކޮށް ތާރީހެއް އިއުލާނު ނުކުރާނަމަ އިލެކްޝަންސް ކޮމިޝަން މެމްބަރުންގެ އިތުބާރު ނެތްކަމުގެ ވޯޓެއް ނަގާނެ ކަމަށެވެ.

Advertisement

11 ފެބްރުއަރީ 2024ގައި މަޖިލީހުން ފާސްކުރި ބިލަށް، މާދަމާއަށް މުއްދަތު ހަމަވާއިރު އަލުން އަނބުރާ ބިލު މަޖިލީހަށް ފޮނުވުމަށް ފަހު ބިލަށް އެއްވެސް ބަދަލެއް ނުގެނެސް މެމްބަރުންގެ އަޣުލަބިއްޔަތުން ފާސްކޮށްފި ނަމަ އެ ބިލެއް ރައީސުލްޖުމްހޫރިއްޔާ ތަސްދީގު ކުރުމަށް ފަހު ސަރުކާރުގެ ގެޒެޓުގައި ޝާއިއު ކުރަންވާނެކަމަށް ގާނުނުއަސާސީގައި ބުނެ އެވެ.

އިލެކްޝަނު ކޮމިޝަނުން އަންނަ މަހު އިންތިހާބް ބޭއްވުމަށް މީސްމީޑިއާގައި ދުވަސް ގުނަން ފަށާފައިވުމާއި ގުޅިގެން ހަބީބް ވިދާޅުވީ އީސީއަށް ތާރީހެއް ނިންމޭނީ ރައީސް ބިލު ތަސްތީގު ކުރެއްވުމުން ކަމަށެވެ. އެ ނޫން ގޮތަކަށް ކޮމިޝަނަށް ތާރީހެއް ނުނިންމޭނެކަމަށް ހަބީބް ވިދާޅުވި އެވެ. އީސީއިން ކައުންޓް ޑައުން ފަށާފައި ވަނީ ކުރިން ވެސް އިންތިޙާބް ބޭއްވުމަށް ކަނޑައެޅު ތާރީޚް 17 މާޗް 2024އަށެވެ.