އަލީ ރަސްގެފާނުގެ ޖިހާދުން ގޮވާލަނީ ބޭރުގެ ފައިބުޑަށް ތިރިނުވުމަށް، މީޑިޔާތަކުން ގައުމާ އެއްކޮޅު ހަބަރުތައް ގެނައުމަށް

Ali Rasgefaanu ge jihaadhun govaalanee beyru ge fai budah thiri nuvumah, media thakun gaumaa ekkolhu habaru thah genaumah

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

11 ފެބުރުވަރީ 2024

އަލީ ރަސްގެފާނުގެ ޖިހާދުން ގޮވާލަނީ ސިޔާސީ މީހުން ބޭރުގެ ފައިބުޑަށް ތިރިނުވުމަށާއި މީޑިޔާތަކުން ގައުމާ އެއްކޮޅު ހަބަރުތައް ގެނައުމަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

މިއަދު ފާހަގަ ކުރަމުންދާ 46 ވަނަ ޝަހީދުންގެ ދުވަހުގެ މުނާސަބަތުގައި ދެއްވި ހިތާބުގައި ޝަހީދުންގެ ދުވަސް ނިސްބަތްވާ ބަތަލު އަލީ ރަސްގެފާނުގެ ޖިހާދުން ދޭ އެންމެ ބޮޑު އެއް ފިލާވަޅަކީ، މާތް ﷲ ހައްގަށް ނަސްރު ދެއްވާނެކަން ކަމުގައި ވިދާޅުވި އެވެ.

އެއީ، ބިމުގެ ކުޑަކަމަކާއި، އާބާދީގެ މަދުކަމަކާ ގުޅިފައި އޮންނަ ކަމެއް ނޫން ކަމަށް ރައީސް ވިދާޅުވި އެވެ.

"އަލީ ރަސްގެފާނުގެ ޖިހާދު އަދުގެ ސިޔާސީ ފަރާތްތަކާ އެބަ މުހާތަބު ކުރޭ. ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލާ. ދިވެހީންގެ ސަލާމަތް ދިވެހީން ހޯދަން އެބަ ގޮވާލާ. ޢަލީ ރަސްގެފާނުގެ ޖިހާދު، މީޑިޔާއާ އެބަ މުހާތަބު ކުރޭ. ހަބަރު ފަތުރާއިރު، ގައުމާ އެއްކޮޅަށް ޚަބަރުތައް ގެންނަން އެބަ ނަސޭހަތް ދޭ. ދޮގު ހަބަރުތައް ނުފަތުރަން އެބަ އިންޒާރު ދޭ،" ރައީސް ވިދާޅުވި އެވެ.

މީގެ އިތުރުން، ޒުވާންކަމުގެ އޮއިވަރުގައި، އަމިއްލަ ދީނާއި، އަމިއްލަ ގައުމު ފަހަނައަޅައި ނުދާން ނަސޭހަތްތެރިވާ ކަމަށް ވެސް ރައީސް ވިދާޅުވި އެވެ.

ރައީސްގެ ވާހަކަފުޅުގައި ދިވެހީންގެ ކާބަފައިން، ޕޯޗުގީޒުންގެ އަޅުވެތިކަމުން ރާއްޖެ މިނިވަންކޮށްފައިވާ ކަމާއި ބޭރުގެ ބާރަކަށް ނަފާ ލިބޭގޮތަށް ކަޅު މުހައްމަދު ރަސްގެފާނު ދޫކުރެއްވި ކިނޮޅަހާއި، އެހެން ރަށްރަށް އަލުން ދިވެހީންނަށް ހޯދައި ދިންކަން ފާހަގަ ކުރެއްވި އެވެ.

އެ މޭރުމުން ވާހަކަފުޅު ދައްކަވަމުން، ދިވެހި ކަނޑުން ގެއްލުނު ބައި މި ސަރުކާރުން އަނބުރާ ހޯދާނެކަމަށް ރައީސް ދައްކަވާ ވާހަކަ ތަކުރާރު ކުރެއްވި އެވެ.

"ދިވެހި ބިމަކީ ބޭރުގެ އަސްކަރީ ބާރުތަކަށް ޖާގަ ނެތް ބިމެއް ކަމުގައި ހަދާނަން. އަދުގެ ދުނިޔޭގައި އަމިއްލަ ފަސްގަނޑު، އެ ބައެއްގެ އަތުގައި ނެތް ޤައުމުތައް އުޅޭ ހާލު އަބަދާ އަބަދު އެބަ ފެނޭ. ފަލަސްތީނަކީ އޭގެ މިސާލެއް. އެފަދަ ދުވަހެއް މި އަމާންކަމުގެ ސުވަރުގެއިން ދެކޭކަށް އަޅުގަނޑުމެން ނޭދެމު،" ރައީސް ވިދާޅުވި އެވެ.

ޝަހީދުންގެ ދުވަސް ފާހަގަކުރަނީ ކޮންމެ އަހަރެއްގެ ވެސް ޝައުބާން މަހުގެ ފުރަތަމަ ދުވަހު އެވެ. އެ ދުވަހަކީ ދިވެހިރާއްޖެ އާއި އިސްލާމް ދީނުގެ ދިފާއުގައި ޕޯޗުގީޒުންނާ ހަނގުރާމަކުރައްވައި، އަލީ ރަސްގެފާނު ޝަހީދުވި ދުވަހެވެ.