އައްޑޫގައި ކުރަމުންދާ މަސްވެރިންގެ އިހުތިޖާޖު؛ ޝިޔާމް ވިދާޅުވީ އިހުތިޖާޖުގެ ކުރިންވެސް މިހާރުވެސް ކަންކަން ބަލަމުން އަންނަ ކަމަށް

Addu gai kuramun anna masveringe ihuthijaaj; Shiyam vidhaalhuvee ihuthijaaj ge kurinves mihaaruves kankan balamun anna kamah

އައްޑޫ ފިޝަރީޒް ކޮމްޕެލްކެސްގައި އިއްޔެ ހަވީރުން ފެށިގެން މަސްވެރިން އަންނަނީ އިހުތިޖާޖު ކުރަމުން

22 ޖޫން 2024

މަސްވެރިންގެ ކަންބޮޑުވުންތަކާއި ގުޅިގެން ބަލަން ޖެހޭ ކަންކަން އިހުތިޖާޖުގެ ކުރިންވެސް އަދި މިހާރުވެސް ބަލަމުންދާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

އައްޑޫ ފިޝަރީޒް ކޮމްޕެލްކެސްގައި އިއްޔެ ހަވީރުން ފެށިގެން މަސްވެރިން އިހުތިޖާޖު ކުރަމުން އަންނާތީ އެކަމާ ގުޅިގެން މިނިސްޓަރު ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ އެ ސަރަހައްދުގައި ކުރިޔަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން މަސްވެރިންގެ ކަންކަން ވަރަށް ގާތުން ބަލަމުން އަދި އަޑު އަހަމުން އަންނަ ކަމަށެވެ.

"އެކަމުގައި މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލުވެސް މިދަނީ ހިއްސާ ކުރަމުން،" ޝިޔާމް ވިދާޅުވެފައިވެ އެވެ.

އެ ސަރަހައްދުގައި ކުރަމުން އަންނަ އިހުތިޖާޖުގައި 80 އެއްހާ މަސްވެރިން އަންނަނީ ހަރަކާތްތެރިވަމުންނެވެ. އިހުތިޖާޖުގެ ބައިވެރިން އަންނަނީ ބޭނި މަހަށް ފައިސާ ނުދީ ތިން މަހަށް ވުރެ ގިނަ ދުވަސްވެފައިވާކަން ފާހަގަކޮށް އެކަމާ ކަންބޮޑުވުން ފާޅު ކުރަމުންނެވެ.

އެކަމުގެ ސަބަބުން މަސްވެރިންނާއި މަސްވެރިންގެ އާއިލާތައް ބިކަވެ، އަސާސީ ހަރަދުތައް ނުކުރެވި ދަރަނިވެރިވެފައިވާ ކަމަށް އެމީހުން އަންނަނީ ބުނަމުންނެވެ. އަދި ކޮންމެ 15 ދުވަހަކުން އެ މީހުންނަށް ފައިސާ ލިބޭނެ ގޮތެއް ހަމަޖައްސައި ދިނުމަށް އެ މީހުން އަންނަނީ ގޮވާލަމުންނެވެ.

ސޯޝަލް މީޑިޔާގައި ދައުރުވަމުން އަންނަ ވީޑިޔޯތަކުން ފެންނަ ގޮތުގައި އެ މީހުން ބޭނުންވަނީ ސަރުކާރުގެ އިސްވެރިޔަކާ ބައްދަލުކޮށް މިކަމާ މެދު ވާހަކަ ދެއްކުމަށެވެ. އަދި މިއީ އެއްވެސް ހާލެއްގައި ސަރުކާރާ ދެކޮޅަށް ކުރާ އިހުތިޖާޖެއް ނޫން ކަމަށާއި މިއީ އެ މީހުންގެ ހައްގުތައް ހޯދުމަށް ވަކާލާތު ކުރުމަށް ކުރާ ކަމެއް ކަމަށް އެ މީހުން އަންނަނީ ބުނަމުންނެވެ.