ފަސް މިލިއަން ގަސް އިންދުމުގެ މަޝްރޫޢެއް ހިންގެވުމަށް ރައީސް މުޢިއްޒް ވަޢުދު ވެވަޑައިގެންފި

5 million gas indhumuge mashroo eh hingevumah raees Muizzu vaudhuve vadaigainfi

ދިވެހި ރާއްޖޭގެ ރަޢިސުލްޖުމްހޫރިއްޔާ ކޮޕް28ގައި ތަޤްރީރް ކުރައްވަނީ، ފޮޓޯ: ރައީސް އޮފީސް

1 ޑިސެންބަރު 2023

މުޅި ރާއްޖޭގައި ފަސް މިލިއަން ގަސް އިންދުމުގެ ބިޔަ މަޝްރޫޢެއް ހިންގެވުމަށް ކޮޕް28ގައި ޤައުމީ ބަޔާން އިއްވަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދު ވެވަޑައިގެންފިއެވެ.

މި ކަން ރައީސް މުޢިއްޒް އިޢުލާން ކުރެއްވީ މި ވަގުތު ޔުނޭޓެޑް އަރެބް އެމިރެޓްސްގައި ކުރިއަށް ދާ 28ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28)ގައި ދިވެހި ރާއްޖޭގެ ޤަޢުމީ ބަޔާން އިއްވަވަމުންނެވެ.

ކޮޕް28 ގައި ބައިވެރިވާ ޤަޢުމުތަކުގެ ލީޑަރުންނާއި މުޙާތަބް ކުރައްވާ، ރާއިސުްލްޖުމްހޫރިއްޔާ ދެއްކެވި ވާހަކަފުޅުގައި ރާއްޖޭގެ ރަށްތަކުގެ ވިލުންތެރިކަން އިތުރު ކުރުމަކީ ސަރުކާރުން އެންމެ އިސްކަންދޭ އެއްކަންތައް ކަމުގައި ވިދާޅުވިއެވެ. ދިވެހިރާއްޖޭގެ ކޮންމެ މުރަކައެއް، ކޮންމެ ވެލި ފުކެއް، ކޮންމެ މަހެއް، އަދި ކޮންމެ ރުކަކީވެސް އަގުހުރި އެއްޗެއްކަމަށާއި، އެތަކެއްޗަށް ލިބޭ ކޮންމެ ގެއްލުމަކީ މުޅި އިޤްތިޞާދަށާއި މުޅި ޤައުމަށްވެސް ލިބޭ އުނިކަމެއް ކަމުގައި އެމަނިކުފާނު ވިދާޅުވިއެވެ.

ވަކި ފަރުދެއްގެ ޙައިޘިއްޔަތުން، ދުނިޔޭގެ ވެށްޓަށްޓަކައި ކޮންމެ މީހަކުވެސް އުފުލަން ޖެހޭ ޒިންމާތަކެއްވާކަން ހަނދުމަކޮށްދެއްވަމުން، އުޖާލާ މުސްތަޤްބަލެއް ބިނާކުރުމަށްޓަކައި ގުޅިގެން މަސައްކަތްކޮށް، އަމަލުތަކުން އެކަން ޔަޤީންކޮށްދެއްވުމަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ.

ރައީސް މުޢިއްޒް ކޮޕް28ގައި އިއްވެވި ޤަޢުމީ ބަޔާނަށް ގިނަބައެއްގެ ތަރުޙީބު އަންނަނީ ލިބެމުންނެވެ.