ޒަކިއްޔާގެ މަރުގެ ތަހުގީގަށް އެފްބީއައިގެ އެހީ ހޯދަން ފަށައިފި

ނ. ހޮޅުދޫގައި ޒަޚަމްތަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލައިގެ ތަޙްޤީޤަށް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) ގެ އެހީތެރިކަން ހޯދުމަށް ދިވެހި ފުލުހުން މަސައްކަތް ފަށައިފިއެވެ.

އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވިދާޅުވީ، ދިގުލައިގެން ގޮސްފައިވާ މި މަރުގެ މައްސަލައިގެ ތަޙްޤީޤަށް އެފްބީއައިގެ އެހީތެރިކަން ހޯދަމުންދާ ކަމަށެވެ. ނަމަވެސް، އެހީތެރިކަން ހޯދާ ސަބަބު ފަހުން ހާމަކުރައްވާނެ ކަމަށް އޭނާ ވިދާޅުވިއެވެ.

ކުރީގައިވެސް މަރުގެ ބޮޑެތި މައްސަލަތަކުގައި އެފްބީއައިގެ އެހީތެރިކަން ދިވެހި ފުލުހުން ހޯދާފައިވެއެވެ.

Advertisement

ޒަކިއްޔާ ދިރިއުޅެމުންދިޔަ ގޭގެ ތެރޭގައި ބޮޑެތި ޒަޚަމްތަކާއެކު އޭނާ މަރުވެފައި އޮއްވާ ފެނުނީ މިދިޔަ ސެޕްޓެންބަރު މަހުގެ 10 ވަނަ ދުވަހުގެ ހެނދުނުއެވެ. މި މަރާ ގުޅިގެން ފުލުހުން މިހާތަނަށް ބުނެފައިވަނީ ޒަކިއްޔާ މަރާލި ކަމުގެ އެއްވެސް ހެއްކެއް ނުވަތަ ނިޝާނެއް މިހާތަނަށް ފެނިފައިނުވާ ކަމަށެވެ.

ނަމަވެސް، ހޮޅުދޫ ރައްޔިތުން މިކަން ޤަބޫލެއް ނުކުރެއެވެ. އެ ރަށުގެ ރައްޔިތުން އަދިވެސް ބުނަމުންދަނީ ބަޔަކު ޒަކިއްޔާ މަރާލި ކަމަށެވެ. އެހެންކަމުން، މި މަރަށް އިންސާފު ހޯދައިދިނުމަށް އެދި މާދަމާވެސް އެ ރަށުގައި އެއްވުމެއް ބޭއްވުމަށް ވަނީ ނިންމާފައެވެ.