ޔުނިވާސިޓީ ލެކްޗަރާއިންނަށް ދެން މަހަކަ 29،900 ރުފިޔާ ލިބޭނެ

University Lecturer in'nah dhen mahaku 29,000 rufiyaa libeyne

މުސާރަބޮޑު ކުރުމަށް އެދި އެމްއެންޔޫ ލެކްޗަރާއިން ކުރި އިއްތިހާދުގެ ތެރެއިން

12 މާރިޗު 2023

ޔުނިވާސިޓީތަކުގައި މަސައްކަތް ކުރާ ލެކްޗަރާއިންގެ މުސާރަ 59 ޕަސެންޓަށް ބޮޑުކުރިކަން ރައީސް އިބްރާހިމް މުހައްމަދު ސޯލިހު މިއަދު އިއުލާން ކުރައްވައިފި އެވެ.

މި އަހަރުގެ ރިޔާސީ ބަޔާން އިއްވަވަމުން ރައީސް ވަނީ ރާއްޖޭގެ ޔުނިވާސިޓީތަކުގައި މަސައްކަތްކުރާ މުވައްޒަފުންގެ މުސާރައަށް ހެޔޮ ބަދަލެއް އަންނާނެ ކަމަށް އިއުލާން ކުރައްވައިފަ އެވެ.

ތ. ހިރިލަންދޫ ސްކޫލްގެ 71 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މުސާރައިގެ މި ކުރިއެރުމާއެކު، އާންމު ލެކްޗަރާއިންނަށް ކުރިން ލިބެމުން އައީ 18،680ރ. ކަމަށް ވިޔަސް މި މަހުން ފެށިގެން އިތުރު ވަގުތުގެ ފައިސާ ނުހިމަނައި، 29،900ރ. ލިބޭނެ ކަމަށެވެ.

"މިއީ 59 އިންސައްތައިގެ ކުރިއެރުމެއް،" ރައީސް ސޯލިހު ވިދާޅުވި އެވެ.

ސީނިއާ ލެކްޗަރާއަކަށް ކުރިން 20،830ރ. ލިބުނު ނަމަވެސް، މި މަހުން ފެށިގެން 34،000ރ. ލިބޭނެ ކަން ވެސް ރައީސް ފާހަގަކުރެއްވި އެވެ. އަދި ޔުނިވާސިޓީތަކުގެ އެހެން ސީނިއާ މަގާމުތަކުގައި ތިބި ޕްރޮސެފަރުންނާއި ލެކްޗަރާއިންގެ މުސާރައަށް ގެނައި ބަދަލު އިއުލާންކުރެއްވި އެވެ.

މަތީ ތައުލީމުގެ މުވައްޒަފުންގެ މުސާރައަށް އަންނަ ބަދަލުތައް:

އެސޯސިއޭޓް ޕްރޮފެސަރެއްގެ މުސާރަ 26،000ރ. އިން 45،000ރ. އަށް

ޑީންއެއްގެ މުސާރަ 30،000ރ. އިން 38،000ރ. އަށް

ރަޖިސްޓްރާގެ މުސާރަ 32،000ރ. - 42،000ރ. އަށް

ވައިސް ޗާންސަލާގެ މުސާރަ 39،000ރ. އިން 48،000ރ. އަށް

ރައީސް ވިދާޅުވީ ސަރުކާރުން ގެންނަ މި ބަދަލާއެކު ޖުމުލަ 767 މުއައްޒަފެއްގެ މުސާރައަށް ބަދަލު އަންނާނެ ކަމަށެވެ. އެކަމަށްޓަކައި ދައުލަތުން އަހަރަކު 62 މިލިއަން ރުފިޔާ ހަރަދު ކުރާނެ ކަމަށް ވެސް ރައީސް ވިދާޅުވި އެވެ.