އުޅިއަށި ބޯޓުގެ މުދާ ސަލާމަތްކުރަން ނުކުތް ބިލެތްފަހި ސްކައުޓަށް ތައުރީފް!

ށ. ބިލެތްފަހި ބަނދަރަށް ވަންނަނިކޮށް، ނެރުގެ ފައިކަށްޓަށް އަރައި އަޑިއަށް ދިޔަ ށ. ކަނޑިތީމުގެ އުޅިއަށި ބޯޓުގައި ހުރި މުދާ ސަލާމަތްކުރަން ނުކުތް ބިލެތްފަހި ސްކޫލުގެ ސަކައުޓަށް ގިނަބަޔަކު ތައުރީފްކޮށްފިއެވެ.

ށ އަތޮޅުގެ ހަތަރު ރަށުގެ މުދާ ބަރުކޮށްގެން ބިލެތްފަށްސައް ވަތް އުޅިއަށި ބޯޓު މިއަދު އެ ރަށު ބަނދަރަށް ވަންނަނިކޮށް، ފައިކަށްޓަށް އަރައި ވަނީ ބަނދަރުތެރެއަށް އަޑިއަށް ގޮސްފައެވެ. ކުޑަވަގުތުކޮޅެއްގެ ތެރޭގައި އެތައް މިލިއަން ރުފިޔާގެ މުދަލާއެކު އެ ބޯޓު އަޑިއަށް ދިޔައިރު، ބިލެތްފަހި ރައްޔިތުން ވަނީ ބުރަ މަސައްކަތުން ގިނަ މުދާތަކެއް ސަލާމަތްކުރުމަށް މަސައްކަތްކޮށްފައެވެ.

އުޅިއަށި ބޯޓު އެކީއެކަށް އަޑިއަށް ގޮސްފައިވާއިރު، އެ ބޯޓުގެ މުދާ ސަލާމަތްކުރުމަށް ރަށު ސްކޫލުގެ ސްކައުޓުން ނުކުތުމަކީ ރިވެތި ނަމޫނާއެކެވެ. އެ ރަށުގެ ކައުންސިލްގެ ރައީސް އަބްދުﷲ ޒިޔާދު "ރަށްފުށު" ނޫހަށް މައުލޫމާތު ދެއްވަމުން ވިދާޅުވީ ބޯޓުގައި ހުރި ގިނަ މުދާތަކެއް ސަލާމަތް ކުރުމަށް ސްކައުޓުން ލިބުނު އެހީތެރިކަން ފާހަގަކުރާ ކަމަށެވެ.

Advertisement

"އަޅުގަނޑުމެނަށް އެ މައުލޫމާތު ލިބުމާއެކު ރަށުގެ ލައުޑް ސްޕީކަރުން ގޮވައި، އެވާހަކަ ހިއްސާކުރުމުން ހުރިހާ ރައްޔިތުންވެސް ނުކުމެ އެކަމުގައި އެހީތެރިވި. ދެން މި ރަށުގައި ސްކައުޓް އޮއްވާ، ސްކޫލުންވެސް ކިޔެވުން ބަންދުކޮށް ސްކައުޓް ކުދިން ވަގުތުން ބަނދަރަށް ފޮނުވާ މުދާ ސަލާމަތްކުރުމުގައި ވަރަށް ބޮޑަށް އެހީތެރިވި،" އަބްދުﷲ ޒިޔާދު ވިދާޅުވިއެވެ.

އޭނާ ވިދާޅުވީ ކަނޑިތީމު، ފޭދޫ، ބިލެތްފަހު އަދި ގޮއިދޫގެ ގިނަ އަދަދެއްގެ މުދާ ބަރުކޮށްގެން އައި އުޅިއަށި ބޯޓުގައި ހުރި ހުރިހާ މުދަލެއް ކަހަލަ ގޮތަކަށް މިހާރު ނަގާފައިވާ ކަމަށެވެ. އެހެން ނަމަވެސް ލޮނު ޖެހިގެން ގިނަ އަދަދެއްގެ މުދާތައް ހަލާކުވެ ވަރަށް ބޮޑެތި ގެއްލުންތަކެއް ވެފައިވާ ކަމަށެވެ.