ކޫލް ސްކޫލް: ސްކޫލްތައް އޭސީކުރުމުގެ މަޝްރޫއު އިފުތިތާހު ކޮށްފި

Cool school: school thah AC kurumuge mashroou ifthithaahu kohffi

'ކޫލް ސްކޫލް' މަޝްރޫއު ފަށަން މިއަދު މާފުށީގައި ބޭއްވި ހަފުލާގެ ތެރެއިން - ފޮޓޯ: އެޑިއުކޭޝަން މިނިސްޓްރީ

2 ޖޫން 2024

ސަރުކާރުގެ ހުރިހާ ސްކޫލެއްގެ ކްލާސް ރޫމްތަކުގައި އޭސީ ހަރުކުރުމުގެ މަޝްރޫއު 'ކޫލް ސްކޫލް' ގެ ނަމުގައި މިއަދު އިފުތިތާހުކޮށްފި އެވެ.

އެ މަޝްރޫއުގެ ދަށުން އޭސީގެ ކުރުމުގެ މަަސައްކަތް މިއަދު ފަށީ ކ. މާފުށީގައި ހުންނަ މާފުށީ ސްކޫލެވެ. އެ ރަށު ސްކޫލް އޭސީ ކުރަނީ ރަށު ކައުންސިލުން އިސް ނަގައިގެން، މާފުށި ލޯކަލް އޮތޯރިތީ ކުންފުންޏާ ހަވާލުކޮށްގެނެވެ.

ހޫނު ގަދަ ކްލާސްތައް އޭސީ ކުރުމަށް އެންމެ ފުރަތަމަ ރައީސް އެންގެވީ ފެބްރުއަރީ 27، ގައި ހދ. މަކުނުދޫއަށް ވަޑައިގަނެ ވާހަކަދައްކަވަމުންނެވެ.

މާފުށީގައި މިއަދު ބޭއްވި ހާއްސަ ރަސްމިއްޔާތެއްގައި މަޝްރޫއު އިފުތިތާހު ކޮށްދެއްވީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އެވެ. ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، މި މަޝްރޫއަކީ ސްކޫލުތަކުގެ މާހައުލު ރަނގަޅުކުރުމަށް ވިސްނައިގެން ސަރުކާރުން ހިންގާ މަޝްރޫއެއް ކަމަށެވެ.

އެ މަޝްރޫއުގެ ދަށުން އޭސީތަކަށް ދޭ ކަރަންޓުގެ 30 ޕަސެންޓު ކަރަންޓަކީ ސޯލާ ޕެނަލް ފަދަ ރިނިއުބަލް އެނާޖީ ބޭނުންކޮށްގެން އުފައްދާ ކަރަންޓަށް ހެދުމަށް ރައީސް މުއިއްޒު އިރުޝާދުދެއްވާފައިވާ ކަމަށް މިއަދުވެސް މިނިސްޓަރު ވިދާޅުވި އެވެ.

އަދި، އެ މަޝްރޫއު ދަށުން ކުރިއަށް މިއޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ސަރުކާރު ސްކޫލުތަކެއް އޭސީ ކުރެވޭނެ ކަމަށްވެސް މިއަދު ވަޒީރު ވިދާޅުވި އެވެ.