ގައުމީ ގަދަ 10 ހޮވުން: މިނިސްޓަރު ދެކެވަޑައިގަންނަނީ ހުއްޓާލަން ވެއްޖެ ކަމެއްގެ ގޮތުގައި

Gaumee gadha 10 hovun: Minister dhekevadaigannavany huttaalan vejje kamehge gothugai

ޖީސީއީ އޯލެވެލް އިމްތިހާނުގައި މުޅި ދުނިޔޭގެ ގަދަ ދިހައެއްގައި ހިމެނުނު ދަރިވަރުން ---- ސަން ފޮޓޯ: ޔޫސުފް ސޮފްވާން

23 ނޮވެންބަރު 2023

ފަހަކަށް އައިސް ބެލެނިވެރިންނާއި، ޓީޗަރުންގެ ބޮޑު ކަންބޮޑުވުމެއް އޮތް އޯލެވެލް އަދި އޭލެވެލްގެ ނަތީޖާތަކަށް ބަލައި ހޮވާ ގައުމީ ގަދަ 10 ހޮވުން ހުއްޓާލަންޖެހޭ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.

ރައީސް ޑރ. މުއިއްޒުގެ ކެބިނެޓުގައި ހިމެނިވަޑައިގަތުމަށްފަހު އެޑިއުކޭޝަން މިނިސްޓަރު ޑރ. އިސްމާއިލް ޝަފީއު "މިހާރު" ނޫހަށް ދިން އިންޓަވިއުއެއްގައި ވިދާޅުވީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ގަދަ 10 ހޮވަން ފެށީ އާއްމުންނަށް ތައުލީމުގެ މުހިއްމުކަން އަންގައިދޭން ކަމަށެވެ. އޭރުގެ ހާލަތަށް ބަލާއިރު، ރަށްރަށުގައި ސްކޫލުތައް ނެތުމާއި އަންހެން ކުދިން ސްކޫލަށް ނުދިއުމުގެ މައްސަލަތައް ހުއްޓަސް، މިހާރު ތައުލީމީ ދާއިރާ ބަދަލުވެފައިވާ ކަމަށް އޭނާ ވިދާޅުވި އެވެ.

ކުރިއާ ޙިލާފަށް ރާއްޖޭގެ ހުރިހާ ރަށެއްގައި ކަހަލަ ގޮތަކަށް މިހާރު ސްކޫލުތައް ހުޅުވާފައިވާއިރު އަދި އާބާދީ ކިތަންމެ ކުޑަ ވިޔަސް އެ ތަނެއްގައި ހަދަމުން އަންނަނީ ކެމްބްރިޖް އިމްތިހާނުކަން މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ މިހާރު މި ބާއްވާ ގޮތަށް ބޮޑެތި ރަސްމިއްޔާތުތަކުގައި އޯ ލެވެލް އަދި އޭ ލެވެލްގައި އެންމެ މޮޅެތި ދަރިވަރުންނަށް އެވޯޑު ދިނުމަކީ ގަބޫލުކުރެވޭ ކަމެއް ނޫންކަމަށެވެ އަދި ޓީޗަރެއްގެ ގޮތުގައި މަސައްކަތްކުރިއިރު ވެސް އެއީ އެހާ ތާއީދުކުރި ކަމެއް ނޫންކަން މިނިސްޓަރު ފާހަގަކުރެއްވިއެވެ.

މީގެ އިތުރުން މި ދާއިރާގައި ކޮންމެ ވެސް ވަރަކަށް މަސައްކަތްކޮށްފައި ހުރި މީހެއްގެ ހައިސިއްޔަތުން އަދި ޔުނިވާސިޓީގައި ވެސް ޓީޗާ ޓްރެއިނިންގައި އުޅެފައި ހުރި މީހެއްގެ ހައިސިއްޔަތުން ގަބޫލުކުރެވެނީ ދާއިރާގައި ހަމަ ޖެނެރަލްކޮށް މި ދާއިރާގެ އެކްސްޕާޓުން ލެވެލްގައި ހަމަ އެއްގޮތަކަށް ވެސް ތާއިދުކުރެވޭ ކަމެއް ނޫންކަންވެސް މިނިސްޓަރު ފާހަގަ ކުރެއްވިއެވެ.

"މިއީ ހަމަ އަޅުގަނޑުމެން ވިސްނައި، ފިކުރުކުރަން ޖެހޭ ކަމެއް. ހުއްޓާލެވެން އޮތް ކަމުގައި ވަންޏާ ހުއްޓާލަންޖެހޭ ކަމެއް [ގަދަ 10 ހޮވުމަކީ]." މިނިސްޓަރު ވިދާޅުވި އެވެ.

ގަދަ 10 ހޮވާތީ ދަރިވަރުންނަށް ވަރަށް ބޮޑެތި ޕްރެޝަރުތައް ކުރިމަތިވާކަން، ބެލެނިވެރިއެއްގެ ހައިސިއްޔަތުން ވެސް ގަބޫލުކުރައްވާ ކަމަށް ޝަފީއު ވިދާޅުވި އެވެ. އެއާ އެކު، ނަފްސާނީ ދުޅަހެޔޮކަމަށް އަސަރުކޮށް، ސްކޫލުތަކުގެ މެދުގައި ނުރަނގަޅު ވާދަވެރިކަމެއް އުފެދިގެންދާ ކަމަށާއި އެކަމުގެ ސަބަބުން އަޅާލުމާއި އެހީތެރިކަން އެންމެ ބޭނުންވާ ދަރިވަރުން އިމްތިހާނުން ބޭރުކޮށްލާ ކަމަށް ވިދާޅުވި އެވެ.

ގަދަ 10 ހޮވުން ހުއްޓާލަންޖެހޭ ކަމަށް މިނިސްޓަރު ވިދާޅުވިއިރު، މީގެ ކުރީގެ ސަރުކާރުތަކުން ވެސް އެކަން އުވާލަން މަސައްކަތްކުރި އެވެ. ނަމަވެސް މިކަން ހުއްޓާލަން ބެލެނިވެރިންގެ ފަރާތުން ދެކޮޅުހެދުންތައް ކުރިމަތިވި އެވެ.