ޔާމީންގެ ކެންޑިޑެސީ ފޯމު ހުށަހަޅުއްވައިފި، މިއަދު ގޮތެއް ނިންމާނެެ

ޖަލު ހުކުމެއް ތަންފީޒުކުރައްވަމުން ގެންދަވާ ރައީސް އަބްދުﷲ ޔާމީން ރިޔާސީ އިންތިޚާބުގައި ވާދަކުރެއްވުމަށް ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅުއްވައިފިއެވެ. 

ރައީސް ޔާމީންގެ ކެންޑިޑެސީ ފޯމު އީސީއަށް ހުށަހަޅާފައިވަނީ މިއަދުއެވެ. އީސީގެ ފަރާތުން ފޯމާއި ހަވާލުވެލެއްވީ ކޮމިޝަންގެ ރައީސް ފުއާދް ތައުފީގެވެ.

ފޯމާއި ހަވާލުވުމަށްފަހު އީސީން ވަނީ ކުރިއަށް އޮތް 24 ގަޑިއިރުތެރޭ ރައީސް ޔާމީންގެ ކެންޑިޑެސީއާއި މެދު ގޮތެއް ނިންމަވާނެކަން ޕީޕީއެމްއަށް އަންގާފައެވެ.

Advertisement

ވ. އާރަށް ކުއްޔަށް ދޫކުރުމުގައި ރިޝްވަތު ގަބޫލުކޮށް އެފައިސާ ލޯންޑަރ ކޮށްފައިވާކަމުގެ ކުށް ސާބިތުވެ ރައީސް ޔާމީން އަންނަނީ 11 އަހަރުގެ ޖަލު ހުކުމެއް ތަންފީޒްކުރައްވަމުންނެވެ. އެހުކުމް އިސްތިއުނާފްކުރުމަށް ހައިކޯޓަށް ހުށަހަޅާފައިވާއިރު، މައްސަލަ ބައްލަވާ ފަނޑިޔާރުންގެ ބެންޗުން ފަނޑިޔާރަކު ޗުއްޓީއަށް ވަޑައިގެންނެވުމުން އެމައްސަލަ ވަނީ މަޑުޖެހިފައެވެ. 

ރައީސް ޔާމީން އިންތިޚާބުގައި ވާދަކުރެއްވުމުގެ މައްސަލައަކީ އާންމުންނާއި ގުޅިފައިވާ މައްސަލައަކަށްވާއިރު އެމައްސަލަ މަޑުޖެހިފައި އޮތުމުން އިދިކޮޅު ޕީޕީއެމް/ޕީއެންސީ ކޯލިޝަނުން އަންނަނީ ކަންބޮޑުވުން ފާޅުކުރަމުންނެވެ.

ރައީސް ޔާމީންގެ ރަނިންމޭޓުގެ ގޮތުގައި ހަމަޖައްސާފައިވަނީ ޑރ މުހައްމަދު ޖަމީލު އަހުމަދެވެ.