ޔާމީން ސިޔާސީ މަސައްކަތް ކުރައްވާ މައްސަލަ ކަރެކްޝަނުން ބަލަން ފަށައިފި

ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވައި އުފައްދަވާ ޕީޕަލްސް ނެޝަނަލް ފްރަންޓް (ޕީއެންއެފް) އޮފީހަށް މިރޭ ވަޑައިގަތުމުން، އެ މައްސަލަ ބަލަމުންދާ ކަމަށް މޯލްޑިވްސް ކަރެކްޝަނަލް ސާވިސްއިން ބުނެފިއެވެ.

ހ. ހުރަފާގޭގައި ހުންނަ އެ އޮފީހަށް ރައީސް ޔާމީން ވަޑައިގަތީ, ޕީއެންއެފް އުފެއްދުމަށް ބޭނުންވާ ފޯމް ފުރުން، އެ ގޭގެ ތިން ވަނަ ފަންގިފިލާގައި ކުރިއަށްދަނިކޮށެވެ. ޖަލު ހުކުމެއްގައި ހުންނެވި ރައީސް ޔާމީން އެ އޮފީހުގައި ހުންނެވި ކަމަށް ވިދާޅުވެ، ކުރީގެ ސައެންސް މިނިސްޓަރު މުހައްމަދު މަލީހު ޖަމާލް ވަނީ އެކްސްގައި ފޮޓޯއެއް ހިއްސާ ކުރައްވާފައެވެ.

ރައީސް ޔާމީން މީގެ ކުރިން ލީޑަރަކަށް ހުންނެވި ޕީޕީއެމްގެ މައި ޖަގަހައަކީ ހުރަފާގެއެވެ. ނަމަވެސް އެތަނުގެ ވެރިފަރާތުން އެތަން ހުސްކުރުމަށް އަންގާފައިވުމުން، އެ ޕާޓީން އަންނަނީ ތަން ހުސްކުރުމުގެ މަސައްކަތް ކުރަމުންނެވެ.

Advertisement

އެގާރަ އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވަނިކޮށް ޔާމީން ގޭ ބަންދަށް ބަދަލުކުރީ މިދިޔަ އޮކްޓޯބަރު 1، ގަ އެވެ. އެއަށް ފަހު މާލޭ ސަރަހައްދުގައި ހަރަކާތްތެރިވެ އުޅެވޭ ގޮތަށް ލުއިތައް ދިނީ އޮކްޓޯބަރު 28، ވަނަ ދުވަހު އެވެ.

މާލޭ ބަންދަށް ބަދަލުކުރުމާއެކު ޔާމީން، ޕީޕީއެމް އޮފީހަށް ވަޑައިގެން ސަޕޯޓަރުންނާ ބައްދަލު ކުރެއްވި އެވެ. އެއަށް ފަހު އޮކްޓޯބަރު 30، ގައި ޕީޕީއެމް އޮފީހުގައި ބޭއްވި ޖަލްސާއެއްގައި ޔާމީން ވާހަކަ ވެސް ދެއްކެވި އެވެ.

އެމަނިކުފާނުގެ އެ އަމަލުތަކާ ގުޅިގެން ކަރެކްޝަންސް އިން ވަނީ, ޔާމީނަށް ދީފައިވާ ލުއިތައް އުވާލާނެ ކަމުގެ އިންޒާރު ދެއްވާފަ އެވެ. އެ ފަހުން ސިޔާސީ ހަރަކާތެއްގައި ފާޅުކޮށް ހަރަކާތްތެރިވެ ވަޑައިނުގެން ހުންނެވުމަށްފަހު އަނެއްކާވެސް މިވަނީ ރޭ ޕީއެންސީ އޮފީހަށް ވަޑައިގެންފަ އެވެ.