ޔާމީނުގެ ރަނިންގް މޭޓަކަށް މިފަހަރުވެސް ޑރ. ޖަމީލް

އިދިކޮޅު ޕީޕީއެމް-ޕީއެންސީގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީންގެ ރަނިން މޭޓަކަށް އެ މަނިކުފާނު 2013ގައި ވެރިކަމަށް ވަޑައިގެންނެވިއިރު ނައިބު ރައީސަކަށް ގެންނެވި ޑރ. މުހައްމަދު ޖަމީލް އަހުމަދު މިއަދު ހަމަޖައްސަވައިފި އެވެ.

ސެޕްޓެމްބަރުގައި ބާއްވާ ރިޔާސީ އިންތިހާބުގައި ވާދަކުރަން ފޯމު ހުށަހެޅުމުގެ ފުރުސަތު ހަމަވާން އެންމެ ހަފްތާއަކަށް ވެފައި ވާއިރު، ރަނިން މޭޓުގެ ވާދަވެރިކަން ހުރިހާ ޕާޓީތަކުގެ ތެރޭގައި ވެސް ވަނީ ބޮޑުވެފަ އެވެ. މައި އިދިކޮޅު ޕާޓީ، ޕީޕީއެމް-ޕީއެންސީގެ ތެރޭގައި ވެސް ރަނިން މޭޓުގެ މަގާމަށް އެކި ބޭފުޅުން ގެންދެވީ ފައިނަންނަގަވަމުންނެވެ.

ޖަމީލުގެ އިތުބާރު ނެތްކަމުގެ ވޯޓު ނަގައި މަގާމުން ދުރުކުރީ ޔާމީންއާއި ދޭތެރޭ ޖެހުނު މައްސަލަތަކަށްފަހުއެވެ. އެއަށް ފަހު އިނގިރޭސިވިލާތުގައި ހުންނަވައިގެން ޔާމީންއާ ދެކޮޅަށް ޖަމީލު މަސައްކަތް ކުރެއްވިއެވެ. މި ސަރުކާރުގެ ގެނައުމަށްޓަކައި ގާސިމްގެ އަރިހުގައި ޖުމްހޫރީ ޕާޓީގައިވެސް މަސައްކަތް ކުރެއްވި ޖަމީލު އަލުން ޕީޕީއެމްއާ ގުޅިވަޑައިގެންނެވީ 2020 ވަނަ އަހަރުއެވެ.

Advertisement

ރަނިން މޭޓުކަމަށް ވާދަކުރައްވަފާނެ ބޭފުޅުންކަމަށް ބެލެވޭ ބޭފުޅުންގެ ތެރޭގައި އެންމެ ގަދަޔަށް އަޑު ފެތުރުނީ ޑރ މުހައްމަދު މުއިއްޒު، އަހުމަދު ޝިޔާމް، ޑރ މުހައްމަދު ޝަހީމް އަލީ ސައީދު އަދި މުހައްމަދު ސައީދު އެވެ.

ޔާމީންގެ މައްޗަށް އިއްވި 11 އަހަރުގެ ޖަލު ހުކުމަކީ ރިޔާސީ އިންތިހާބުގައި ވާދަކުރާ ކެންޑިޑޭޓެއްގެ ކިބާގައި ހުންނަން ވާނެ ކަމަށް ގާނޫނުއަސާސީގައި ބަޔާންކުރާ ޝަރުތެއް އުނިވުމެވެ. ގާނޫނުއަސާސީ ބުނާ ގޮތުން 12 މަހަށް ވުރެ ދިގު މުއްދަތުގެ ޖިނާއީ ހުކުމެއް އިއްވާފައިވާ މީހަކަށް ރިޔާސީ އިންތިހާބުގައި ބައިވެރިވެވޭނީ އެ ހުކުމެއް ތަންފީޒްކޮށް ނިމުނުތާ ތިން އަހަރު ވުން ނުވަތަ މައާފު ލިބުނުތާ ތިން އަހަރު ހަމަވެއްޖެ ނަމަ އެވެ.