ތިން ލީޑަރުންނަށް އަތޮޅުތެރެއިން ސައިޒު ފެނި އެއްމޭޒަކަށް އަރަން މަޖުބޫރުވެއްޖެ!

ޖުމްހޫރީ ޕާޓީ، މޯލްޑިވްސް ނޭޝަނަލް ޕާޓީ (އެމްއެންޕީ) އަދި ދަ ޑިމޮކްރެޓްސް ގުޅިގެން އެއް ރިޔާސީ ކެންޑިޑޭޓަކު ނެރުމަށް މަޖުބޫރުވެ އެކަމަށް އެއްބަސްވެއްޖެއެވެ.

ޖޭޕީގެ ލީޑަރު ގާސިމް އިބްރާހިމާއި ޑިމޮކްރެޓްސްގެ ލީޑަރު މުހައްމަދު ނަޝީދާއި އެމްއެންޕީގެ ރައީސް މުހައްމަދު ނާޒިމް ވަނީ މިއަދުގެ ވަގުތެއްގައި ޖޭޕީގެ މައި އޮފީސް، ކުނޫޒުގައި ބައްދަލުކުރައްވާފައެވެ. އެބައްދަލުވުމުގައި ކުރިއަށްދިޔައީ ކުރިއަށް އޮތް ރިޔާސީ އިންތިޚާބުގެ މަޝްވަރާތަކެވެ. 

ބައްދަލުވުމަށްފަހު ކުރިއަށް ދިޔުމަށް ނިންމާފައިވާ ފޯމިޔުލާއަކީ އެއް ކެންޑިޑޭޓަކު ނެރި ގުޅިގެން މަސައްކަތްކުރުންކަމަށް ތިން ލީޑަރުން ވަނީ އިއުލާންކުރައްވާފައެވެ. ތިން ލީޑަރުންވެސް ވަނީ އެފޯމިޔުލާގައި މަސައްކަތްކުރެވޭނެކަމަށް ވިދާޅުވެފައެވެ. 

Advertisement

ތިން ޕާޓީއަށްވެސް މިގޮތަށް ކުރިއަށް ދިޔުމަށް މަޖުބޫރުވީ އަތޮޅުތެރެއިން އެޕާޓީތަކަށް ތާއީދުނެތްކަން ހާމަވުމުންކަމަށް ބެލެވެއެވެ.

މިތިން ސިޔާސީ ޕާޓީންވެސް ރައީސް އިބްރާހިމް މުހައްމަދު ސޯލިހުގެ ވެރިކަމާއި ދެކޮޅަށް ގުޅިގެން މަސައްކަތް ކުރުމަށް ނިންމާފައިވީނަމަވެސް، އިދިކޮޅު ޕީޕީއެމް، ޕީއެންސީ ކޯލިޝަނުން މިތިން ޕާޓީއާއި ގުޅުމަށް ނިންމާފައިނުވެއެވެ. އެހެންނަމަވެސް، ޖޭޕީ، އެމްއެންޕީ އަދި ޑިމޮކްރެޓްސްގެ ވިސްނުމަކީ ސަރުކާރާއި ދެކޮޅު ޕާޓީތަކުން އެއް ކެންޑިޑޭޓަކު ނެރުމެވެ. 

ތިން ޕާޓީން ގުޅިގެން މަސައްކަތްކުރުމަށް ނިންމިނަމަވެސް، މިތިން ލީޑަރުންގެ ތެރެއިން ގާސިމާއި ނާޒިމަކީ ޕާޓީގެ ރިޔާސީ ޓިކެޓާއި ހަވާލުވެފައިވާ ދެބޭފުޅުންނެވެ. ރައީސް ނަޝީދުވެ ސަރުކާރާއި ދެކޮޅަށް ކެމްޕެއިން ކުރައްވަމުން ގެންދެވިނަމަވެސް، ޑިމޮކްރަޓްސްގެ ޕްރައިމަރީއަށް ކުރިމަތިނުލައްވާނެކަމަށް މިހާރު ވަނީ ވިދާޅުވެފައެވެ.