ރަނިންމޭޓަކު ކަނޑައެޅިކަމަށް ބުނާ ޚަބަރު ޕީޕީއެމްއިން ދޮގުކޮށްފި

ރައީސް އަބްދުﷲ ޔާމީންގެ ރަނިންމޭޓްގެ ގޮތުގައި ޕީޕީއެމްގެ ބޭފުޅަކު ކަނޑައަޅުއްވައިފިކަމަށް ބުނާ ޚަބަރު ޕީޕީއެމްއިން ދޮގުކޮށްފިއެވެ. 

ޕީޕީއެމްއިން މީޑީޔާތަކަށް މައުލޫމާތު ދިން ގޮތުގައި ރަނިންމޭޓު ކަނޑައެޅުމުގެ ބާރު ޕާޓީގެ އަސާސީ ގަވާއިދުގެ ދަށުން ލިބިވަޑައިގަންނަވާނީ ރިޔާސީ ކެންޑިޑޭޓަށެވެ. ޕީޕީއެމްއިން އަންނަނީ ރިޔާސީ އިންތިޚާބުގެ ކުރިން ރައީސް ޔާމީން މިނިވަންކޮށް ޕާޓީގެ ރިޔާސީ ކެންޑިޑޭޓުގެ ގޮތުގައި ރައީސް ޔާމީން ނެރުމަށް މަސައްކަތްކުރަމުންނެވެ. އެޕާޓީން ވަނީ ކަރެކްޝަންސް މެދުވެރިކޮށް ކެންޑިޑެސީ ފޯމު ފުރުމަށް ރައީސް ޔާމީންގެ ސޮއިވެސް ވަނީ ހޯއްދަވާފައެވެ.

ޕީޕީއެމްއިން ބުނީ ރަނިން މޭޓު ކަނޑައެޅުމުގެ ބާރު ރައީސް ޔާމީނަށް ލިބިލެއްވިނަމަވެސް، ރަނިންމޭޓުގެ ގޮތުގައި ކަނޑައެޅުއްވުމަށް ބައެއް ބޭފުޅުންގެ ނަންތައް އެމަނިކުފާނަށް ފޮނުއްވުމަށް ލީޑަރޝިޕްގެ އަރިހުގައި އެދިވަޑައިގެންފައިވާ ކަމަށެވެ. 

Advertisement

އެހެންނަމަވެސް ލީޑަރޝިޕްގެ އިއްތިފާގުން ނިންމާފައިވަނީ ނަންތަކުގެ ލިސްޓެއް ދިނުމުގެ ބަދަލުގައި ރައީސް ޔާމީން ބޭފުޅަކު އިޚްތިޔާރު ކުރެއްވުމަށް ދަންނަވަންކަމަށް ޕީޕީއެމްއިން ވަނީ ބުނެފައެވެ. 

ރަނިން މޭޓުކަމަށް ވާދަކުރައްވަފާނެ ބޭފުޅުންކަމަށް ބެލެވޭ ބޭފުޅުންގެ ތެރޭގައި ޑރ މުހައްމަދު މުއިއްޒު، އަހުމަދު ޝިޔާމް، ޑރ މުހައްމަދު ޝަހީމް އަލީ ސައީދު އަދި މުހައްމަދު ސައީދު ހިމެނިވަޑައިގަންނަވައެވެ.

ރައީސް ޔާމީން އަންނަނީ މިހާރުވެސް 11 އަހަރުގެ ޖަލު ހުކުމެއް ތަންފީޒް ކުރައްވަމުންނެވެ. އެމައްސަލަ އިސްތިއުނާފްކުރުމަށް ހައިކޯޓަށް ހުށަހެޅި ނަމަވެސް މައްސަލަ ބައްލަވާ 3 ފަނޑިޔާރުންގެ ތެރެއިން ފަނޑިޔާރަކު ޗުއްޓީއަށް ވަޑައިގެންނެވުމުން އިންތިޚާބުގެ ކުރިން މައްސަލަ ނިމިދާނެކަމާއިމެދު މިހާރު ވަނީ ސުވާލު އުފެދިފައެވެ.