"ރިޒޯޓު މުވައްޒަފުން ތުނބުޅި ބެހެއްޓުމުގެ އުސޫލު އެކުލަވާލުން ނިމުމަކާއި ގާތަށް، މުވައްޒަފުން އެދޭ ފަދަ ބަދަލަކަށް ވާނެ!"

މަސައްކަތްތެރިންގެ ހައްގުތައް ކަށަވަރުކޮށްދިނުމަކީ މެދުކެނޑުމެއްނެތި އެއިރެއްގައި އޮންނަ ސަރުކާރަކުން އަބަދުވެސް އެންމެ އަހަންމިއްޔަތުކަން ދޭންޖެހޭ އެއް ކަންތަކެވެ. މީގެ ތެރޭގައި އަލަށް ފެންމަތިވާ މައްސަލަތަކައް ހައްލު ހޯދައިދިނުމާއި، ގާނޫނީ އޮނިގަނޑުތައް ކަނޑައެޅުމާއި ނުވަތަ އެފަދަ ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނައުމަކީ އަބަދުވެސް ކުރަންޖެހޭ ކަންކަމެވެ. 

މަސައްކަތްތެރިންގެ ހައްގުތަކުގެ ވާހަކަ ދައްކާއިރު، ރިޒޯޓު މުވައްޒަފުންގެ ހައްގުތަކުގެ ވާހަކައަކީ ވަކިން ފާހަގަކޮށް އަބަދުވެސް ދެކެވެމުންދާ ވާހަކައެކެވެ. ރިޒޯޓު މުވައްޒަފުންގެ ހައްގުތައް ކަށަވަރުކޮށްދިނުމަށް މިސަރުކާރުން މުޅިން އަލަށް ބައެއް އުސޫލުތައްވެސް އެކުލަވާލާފައިވާކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފާހަގަކުރައްވައެވެ. އޭގެ ތެރޭގައި 

1. މިނިމަމް ވޭޖް ކަނޑައެޅުން
2. ސާވިސް ޗާޖުން މިންވަރެއް ދިނުން ލާޒިމްކުރުން
3. ސްކޫލް ޗުއްޓީ ޖޫން/ ޖުލައިއަށް ބަދަލުކުރުން ހިމެނެއެވެ.

ރިޔާސީ އިންތިޚާބުގެ ފުރަތަމަ ބުރަށް ކުރިއަށްގެންދިޔަ ކެމްޕެއިންގައި ބ. ކެންދޫގައި ބޭއްވި ޖަލްސާގައި ރިޒޯޓް މުވައްޒަފުން ހެދުން އެޅުމާއި ބެހޭ އުސޫލު އެކުލަވާލުން ނިމުމަކާއި ވަރަށް ގާތްވެފައިވާކަމުގެ ޚަބަރު ވަނީ ދެއްވާފައެވެ. މިއީ ޚާއްސަގޮތެއްގައި ތުނބުޅި ގްރޫމްކުރުމާއިމެދު އަބަދުވެސް އުފެދިފައިވާ ދެބަސްވުމަށް ހައްލު ލިބޭނެކަމެއްގެ ގޮތުގައި ރަ އެއުސޫލު ވެގެންދާނީ މުވައްޒަފުން އެދޭފަދަ ބަދަލަކަށް ކަމަށް ރައީސް ވިދާޅުވެފައިވެއެވެ.

Advertisement

"ކަންކަން ނިންމަންވާނީ މަޝްވަރާގެ މަތިން! ތިމާއަށް އެކަނި ފެންނަ ގޮތް އެއީ ރަނގަޅު ގޮތެއް ނޫން! މިކަމަށްވެސް ހައްލު ހޯދޭނެ!"

ރިޒޯޓު މުވައްޒަފުން ހެދުން އެޅުމުގެ އުސޫލު މިހާރު އޮތީ ނިމުމަކާއި ގާތުގައިކަން ފާހަގަކުރައްވައި ރައީސް ވަނީ މަސައްކަތްތެރިން ބޭނުންވާފަދަ ރަނގަޅު ހައްލެއް، ދާއިރާގެ އިސްވެރިންވެސް ބޭނުންވާ ގޮތަށް ލިބިގެންދާނެކަމުގެ ޔަގީންކަން ދެއްވާފައެވެ. ރައީސް ވިދާޅުވީ މިއިން ކޮންމެ ކަމަކީވެސް ގިނަ ބައެއްގެ ހައްގުތަކާއި ގުޅިފައިވާ ކަމެއްކަމަށެވެ. އެގޮތުން ވަޒީފާ ދޭ ފަރާތާއި ވަޒީފާ އަދާކުރާ ފަރާތުގެ ހައްގުތައް ރައްކާތެރިކުރަންޖެހޭކަން ރައީސް ފާހަގަކުރެއްވިއެވެ.

މީގެ އިތުރަށްވެސް މަސައްކަތްތެރިން ބޭނުންވާ އިތުރު އެހެން އުސޫލުތަކުގެ މަސައްކަތްތައްވެސް ކުރިއަށްދާކަން ފާހަގަކުރެއްވިއެވެ. އެގޮތުން މަސައްކަތުގެ މާހައުލުގައި ދިމާވާ ކަންކަން ހައްލުކުރުމަށާއި ރައްކާތެރިކަން ކަށަވަރުކޮށްދިނުމަށް ބޭނުންވާ ގާނޫނީ އޮނިގަނޑު އެކުލަވާލުމަށް މަޖިލީހުގައި މިހާރުވެސް އިންޑަސްޓްރިއަލް ރިލޭޝަންސް (އައިއާރް) ބިލާއިއޮކިޔުޕޭޝަނަލް ހެލްތު އެންޑް ސޭފްޓި ބިލުގެ މަސައްކަތް ކުރިއަށްދާކަމަށް ރައީސް ވިދާޅުވެފައިވެއެވެ.

"މަޖިލީހުގައި އެމަސައްކަތްތައް އެބަހުރި، މިއަހަރު ނިމުމުގެ ކުރިން ފާސްކުރަންޖހޭ ބިލުތައް ފާސްކޮށް އަމަލުކުރެވޭ ގޮތް ހަދައިދޭނަން"

މިއިން ކޮންމެ ކަމަކީވެސް ޒަމާންވީ ޝަކުވާތަކަށްވާއިރު، މިކަމުގައި ދެކޮޅުވެސް އޮންނަކަން ރައީސް ފާހަގަކުރައްވައެވެ. ވަޒީފާ އަދާކުރާ ފަރާތާއި ވަޒީފާ ދޭ ފަރާތުގެ ހައްގުތައްވެސް ރައްކާތެރިކޮށްދޭންޖެހޭކަން ފާހަގަކުރައްވައި ރައީސް އަންނަނީ މަޝްވަރާކޮށްގެން ހައްލުނުކުރެވޭނެ ކަމެއް ނޯންނާނެކަން ތަކުރާރުކޮށް ފާހަގަކުރައްވަމުންނެވެ.