ރައްޔިތުން އެދެފިނަމަ ކޮންމެ ކަމެއްވެސް ޖެހޭނީ ހާމަކުރަން: ގާސިމް

ރައްޔިތުންގެ ވޯޓުން އިންތިޚާބުވެފައި ތިބޭ ބޭފުޅުން، ރައްޔިތުން އެދެފިނަމަ ކޮންމެ ކަމެއްވެސް ހާމަކުރަންޖެހޭނެކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ. 

ގާސިމްގެ މެނިފެސްޓޯ އިފްތިތާހުކުރުމަށް ބޭއްވި ޖަލްސާގައި ވާހަކަފުޅުދައްކަވަމުން ގާސިމް ވަނީ ރައްޔިތުން އެދެފިނަމަ ހާމަނުކުރެވޭނެ އެއްވެސް އެއްޗެއް އޮވެގެން ނުވާނެކަމަށް ވިދާޅުވެފައެވެ. ރާއްޖޭގެ ވެރިއަކު އެހެން ގައުމެއްގެ ވެރިއަކަށް ފޮނުވާ ސިޓީވެސް އެކަމުން އިސްތިސްނާ ނުވާނެ ކަމަށާއި އެފަދަ ލިޔުމެއް ހާމަކުރުމަށްވެސް ރައްޔިތުން އެދެފިނަމަ އެކަން ކުރަން ޖެހޭނެކަމަށް ގާސިމް ވިދާޅުވިއެވެ. 

"ރައްޔިތުން ބުނެފިއްޔާ ޖަންގިޔާ ބާލާފައިވެސް ދައްކަންޖެހޭނެ. އައުރަ ކަޝްފުކުރާ ވާހަކައެއް ނޫން މިބުނީ. އަޅުގަނޑު މިދަންނަވަނީ ރައްޔިތުން ހަވާލުކުރިކަމެއް ގާނޫނީ އިމުގެ ތެރެއިން ނޫން ގޮތަކަށް އެއްވެސް މަގާމެއް ފުރުމުގެ ބާރެއް ލިބިގެން ނުވެޔޭ"

ގާސިމް މިހެން ވިދާޅުވެފައިވާއިރު ރައީސް އިބްރާހިމް މުހައްމަދު ސޯލިހުގެ ކޯލިޝަން ސަރުކާރުގައި ކޯލިޝަން ޕާޓީތަކުގެ މެދުގައި ޖެހުނު އެއް މައްސަލައަކީ މޮރިޝަސް މައްސަލާގައި ކަންތައްވެގެން ދިޔަ ގޮތުގެ ތެރެއިން ޖެހުނު މައްސަލައެވެ. މީގެ ތެރޭގައި ދެގައުމުގެ ވެރިންގެ މެދުގައި ބަދަލުކޮށްފައިވާ ސިޓީތައް ހާމަނުކުރުމާއި އެމައްސަލަ ނިމުނުއިރު ރާއްޖެއަށް ގެއްލުންވާ ގޮތަށް މައްސަލަ ނިންމިކަމަށް ބައެއް ފަރާތްތަކުން އޭރު ތުހުމަތުކޮށްފައިވެއެވެ.

Advertisement

މީގެ އިތުރުންވެސް، ރާއްޖޭގެ އެކި ހިސާބުތަކުގައި ތިބި އިންޑިޔާ ސިފައިންގެ އަދަދު ހާމަނުކުރުމަކީވެސް މިސަރުކާރަށް އަމާޒުވި އެއް ފާޑުކިޔުމެވެ. އިންފޮމޭޝަން ކޮމިޝަން އޮފީސް މެދުވެރިކޮށް އެމައުލޫމާތު ހާމަކުރުމަށް އެދި ހުށަހަޅައި، ކޯޓު މެދުވެރިކޮށްވެސް އެއަދަދު ހޯދުމަށް އޮންލައިން މީޑިޔާއަކުން މަސައްކަތްކޮށްފައިވެއެވެ. އަދި އެކަމަށް އިދިކޮޅު ޕީޕީއެމް ޕީއެންސީ ކޯލިޝަނުންވެސް ވަކާލާތުކޮށްފައިވެއެވެ. އެހެންނަމަވެސް ޑިފެންސް މިނިސްޓްރީން އެއަދަދު ހާމަކޮށްފައެއް ނުވެއެވެ. 

ގާސިމް ވަނީ އޭނާ ދޫކޮށްފައިވާ ހުރިހާ ސްޓުޑެންޓް ލޯނުތައް މައާފްކޮށްފައިވާކަން މިރޭ އިއުލާންކުރައްވާފައެވެ. އަދި މާސްޓަރސް އާއި ހަމައަށް މަތީ ތައުލީމު ހާސިލްކުރުމުގެ ފުރުސަތު ހިލޭކޮށްދެއްވާނެކަމަށް ވިދާޅުވެފައިވެއެވެ.