ރައީސް ސޯލިހުގެ ރަނިންމޭޓަކަށް ޕީޖީ ލީޑަރު އަސްލަމް

ރައީސް އިބްރާހިމް މުހައްމަދު ސޯލިހުގެ ރަނިންމޭޓަކަށް އެމްޑީޕީގެ ޕާލިމަންޓްރީ ގްރޫޕްގެ ލީޑަރު މުހައްމަދު އަސްލަމް ހަމަޖައްސައިފިއެވެ. 

ރައީސް ސޯލިހުގެ ރަނިންމޭޓުކަމަށް އައްޔަންކުރާނެކަމަށް ބެލެވުނު ބޭފުޅުންގެ ތެރޭގައި މިހާރުގެ ނައިބުރައީސް ފައިސަލް ނަސީމް އަދި ފޮރިން މިނިސްޓަރ އަބްދުﷲ ޝާހިދު ހިމެނެއެވެ.

އަސްލަމަކީ ރައީސް ސޯލިހުގެ ރަނިންމޭޓުކަން ރަސްމީކޮށް އަދި އިއުލާންކޮށްފައެެއް ނުވެއެވެ. 

Advertisement

ރިޔާސީ އިންތިޚާބަށް ވަގުތު ކުޑަތަންވަމުންދާއިރު ރިޔާސީ ކެންޑިޑޭޓުން އަންނަނީ ރަނިންމޭޓުން އައްޔަންކުރުމުގެ މަސައްކަތްތައް ކުރަމުންނެވެ. އެންމެ ފުރަތަމަ ރަނިންމޭޓު ކަނޑައަޅާފައިވަނީ ރައީސް އަބްދުﷲ ޔާމީނެވެ. ރައީސް ޔާމީންގެ ރަނިންމޭޓަކަށް ހަމަޖައްސާފައިވަނީ އެމަނިކުފާނުގެ ވެރިކަމުގައި ނައިބުރައީސްކަން ކުރެއްވި އަދި މިހާރު ރައީސް ޔާމީންގެ ގާނޫނީ ވަކީލުކަން ކުރައްވަމުން ގެންދަވާ ޑރ މުހައްމަދު ޖަމީލު އަހުމަދެވެ.

ރައީސް ސޯލިހުގެ އިތުރުން މިހާރު އިންތިޚާބުގައި ވާދަކުރައްވާނެކަމަށް ބެލެވެނީ ޑިމޮކްރެޓްސްއިން އިލްޔާސް ލަބީބު، އެމްއެންޕީން މުހައްމަދު ނާޒިމް، ޖޭޕީން ގާސިމް އިބްރާހިމެވެ. ރައީސް ޔާމީނަށް އިންތިޚާބުގައި ވާދަނުކުރެއްވޭނެކަމަށް އީސީން ނިންމުމުން އެމައްސަލަ ކޯޓަށް ހުށަހަޅައި އިއްޔެ ވަނީ ޝަރީއަތުގެ އަޑުއެހުންތައް ނިންމާލާފައެވެ. ރައީސް ޔާމީނަށް ވާދަނުކުރެވޭ ހާލަތެއްގައި ޕީއެންސީގެ ފަރާތުން ޑރ މުހައްމަދު މުއިއްޒު ވާދަކުރުމަށްވެސް ވަނީ ނިންމާފައެވެ.

ޑިމޮކްރެޓްސް، ޖޭޕީ އަދި އެމްއެންޕީން ކޯލިޝަން ހަދައި އެއް ކެންޑިޑޭޓަކު ނެރުމަށްވެސް އިއުލާންކުރިއެވެ. އެހެންނަމަވެސް، އެނިންމުމާއި އެއްގޮތަށް މަސައްކަތްކުރަމުންދާތަނެއް އަދި ނުފެނެއެވެ.