ޕްރައިމަރީއަކާ ނުލައި ޕީޕީއެމް - ޕީއެންސީގެ ޕްލޭން "ބީ" އަށް ޖާގަ ދިނުން އިންސާފުވެރި؟

އިދިކޮޅުގެ ބެކްއަޕް ކެނޑިޑޭޓެއްގެ ގޮތުގައި ޕީއެންސީގެ ފަރާތުން ކެނޑިޑޭޓެއް ނެގުމުގެ އިހުތިޔާރު ރައީސް ޔާމީނަށް ދިނުމަށް އިދިކޮޅުގެ ލީޑަރޝިޕުން މިއަދު ނިންމައިފިއެވެ.

މިއަދު ހެނދުނު 11:00 ގައި ބޭއްވި ޕީޕީއެމް/ޕީއެންސީ ލީޑަރޝިޕް ބައްދަލުވުމުގައި ބައިވެރިވި ހުރިހާ ލީޑަރުންގެ އިއްތިފާގުން ނިންމާފައިވަނީ ޕީއެންސީގެ ފަރާތުން ކެނޑިޑޭޓެއް ނެގުން ރައީސް ޔާމީނަށް ދޫކޮށްލުމަށެވެ. ރައީސް ޔާމީން އިއްޔެ ވަނީ ޕީއެންސީގެ ސެނެޓުން ކެނޑިޑޭޓަކު ހަމަޖެއްސުމަށް އިރުޝާދު ދެއްވާފައެވެ.

ޕީއެންސީގެ ފަރާތުން ކެނޑިޑޭޓެއް ހަމަޖެއްސުމަށް ނިންމާފައިވާއިރު, ރައީސް ޔާމީންގެ ކެނޑިޑެސީ ބަލައިނުގަތް މައްސަލަ އިދިކޮޅުން މިހާރު ވަނީ ސުޕްރީމް ކޯޓަށް ހުށަހަޅާފައެވެ. އަދި އެ މައްސަލަ ކޯޓުން މިއަދު ބަލައިގެންފައިވާއިރު 7 ދުވަސް ތެރޭގައި މައްސަލަ ނިންމަންޖެހެއެވެ. 

Advertisement

ރައީސް ޔާމީނުގެ ވަކީލު އަދި ރަނިންމޭޓު ޑރ.ޖަމީލު ވަނީ މައްސަލާގައި ކާމިޔާބު ލިބި ރައީސް ޔާމީނުގެ ނަންފުޅު ވޯޓު ކަރުދާހުގައި އޮންނާނެ ކަމަށް ވިދާޅުވެފައެވެ.

ޖަލުގައި އޮންނަވައިގެން ޔާމީން ވަނީ ކެންޑިޑެސީ ފޯމުގައި މިފަހުން ވަނީ ސޮއި ކުރައްވައިފައެވެ. އަދި، ޕީޕީއެމުން އިއްޔެ ވަނީ އެ ފޯމު އީސީއާ ހަވާލުކޮށްފައެވެ. އެކަމަކު، އީސީން ނިންމީ ޖަލު ހުކުމެއް ތަންފީޒު ކުރައްވަމުން ގެންދަވާތީ، ޔާމީންގެ ކެންޑިޑެސީ ބަލައިނުގަންނާށެވެ.

ޔާމީނަށް ވާދަނުކުރެވޭނެ ކަމަށް އީސީން ނިންމާފައިވަނީ، ޔާމީން މިހާރު ވެސް 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާތީ، ގާނޫނު އަސާސީގެ 109 ވަނަ މާއްދާގެ ޅ ގައި ބަޔާންކުރާ ޝަރުތު ހަމަނުވާ ކަމަށެވެ.

ރައިސުލްޖުމްހޫރިއްޔާ ކަމަށް ކުރިމަތިލުމުގެ ޝަރުތުތަކުގެ ތެރޭގައި ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ކޮށްފައިވާ މީހަކު ނަމަ, އެ ހުކުމް ތަންފީޒުކޮށް ނިމުނުތާ ނުވަތަ ހުކުމް ކަނޑައެޅި އަދަބު މާފު ކުރިތާ ތިން އަހަރުވެފައި ވުން ހިމެނެއެވެ.