ޕީޕީއެމް - ޕީއެންސީ ޕްރައިމަރީ މި މަހު 23ގައި ބާއްވަން ނިންމައިފި

ސަރުކާރު ހިންގާ ކޯލިޝަން ޕީޕީއެމް/ޕީއެންސީގެ މަޖިލިސް ޕްރައިމަރީ މި މަހު 23 ގައި ބާއްވަން އެ ޕާޓީން ނިންމައިފިއެވެ.

އެކަން ނިންމީ ޕީޕީއެމާއި ޕީއެންސީން ގުޅިގެން މިރޭ ބޭއްވި ސެނެޓް ބަައްދަލުވުމުގައެވެ. އެ ބައްދަލުވުމުގައި ނިންމާފައި ވަނީ މާދަމާ އިން ފެށިގެން އަންނަ ބުދަ ދުވަހުގެ ނިޔަލަށް ޕްރައިމަރީއަށް ކުރިމަތިލުމަށް ހުޅުވާލުމަށެވެ. އަދި ޕްރައިމަރީގައި ވޯޓުލެވޭނީ އަންނަ އާދީއްތަ ދުވަހުގެ ނިޔަލަށް ޕީޕީއެމާއި ޕީއެންސީގައި ތިބި މެމްބަރުންނަށެވެ.

މަޖިލިސް ޕްރައިމަރީ ބާއްވަން ނިންމާފައި ވަނީ ދެ ޕާޓީގެ މެމްބަރުންނަށް ވޯޓުލެވޭނެ ގޮތަށެވެ.

Advertisement

ދެ ޕާޓީގެ ޖޮއިންޓް ސެނެޓްގެ ބައްދަލުވުމަށް ފަހު، މިރޭ ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވި ގޮތުގައި ސެނެޓުގެ ބައްދަލުވުމުގައި ކުރިއަށް އޮތް އާންމު  އިންތިހާބަށް ވާދަކުރުމާ ގުޅޭ ގޮތުން އުސޫލެއް ފާސްކޮށްފައިވާ ކަމަށެވެ.

"އެ އުސޫލު ބުނާ ގޮތުން އެންމެ ފުރަތަމަ ކަމަަކަށް، ކޯލިޝަންގެ ޓިކެޓަށް ޝައުގުވެރިވެވަޑައިގަންނަވާ ބޭފުޅުންނަށް ހުޅުވާލެވޭ ޕްރައިމަރީއަށް ކުރިމަތިލުމަށް މި ހުޅުވާލަނީ މާދަމާ. ޕްރައިމަރީ ބާއްވަނީ މި މަހުގެ 23 ވަނަ ދުވަހު،" އަބްދުއްރަހީމް ވިދާޅުވި އެވެ.

އަދި އޭނާ ވިދާޅުވި ގޮތުގައި ޕްރައިމަރީގައި ވާދަ ކުރެއްވޭނީ ވެސް މި މަހުގެ 10 ވަނަ ދުވަހުގެ ނިޔަލަށް އެ ދެ ޕާޓީގައި ތިއްބަވާ މެންބަރުންނަށެވެ. 

ޕްރައިމަރީއަށް ކުރިމަތިލުމަށް ހުޅުވާލަނީ، މާދަމައިން ފެށިގެން މި މަހު 11 އަށެވެ.

"11 ވަނަ ދުވަހުގެ ކަނޑައެޅޭ ވަގުތެއްގެ ކުރިން ޖެހޭނެ ކުރިމަތިލުމަށް ފޯމު ހުށަހެޅުވުމަށް،" ރައީސް މުހައްމަދު މުއިއްޒުގެ ސުޕެޝަލް އެޑްވައިޒަރުގެ މަގާމުގައި ވެސް ހުންނެވި އަބްދުއްރަހީމް ވިދާޅުވި އެވެ.