ޕީޕީއެމްއިން އެހެން ޕާޓީތަކާއި ގުޅުމަށް އޮތް ޝަރުތަކީ ކެންޑިޑޭޓަކަށް ޔާމީން ނެރުން

ޕްރޮގްރެސިވް ޕާޓީ އޮފް ދަ މޯލްޑިވްސް (ޕީޕީއެމް)އިން އިދިކޮޅު އެހެން ޕާޓީތަކާއި ގުޅުމަށް އޮތް ޝަރުތަކީ ކެންޑިޑޭޓަކަށް ރައީސް އަބްދުﷲ ޔާމީން ނެރުންކަމުގައި އެޕާޓީން ބުނެފިއެވެ. 

ޖުމްހޫރީ ޕާޓީ، އެމްއެންޕީ އަދި ޑިމޮކްރެޓްސްއިން ގުޅިގެން އެއް ކެންޑިޑޭޓަކު ނެރުމަށް ނިންމައި އެކަން ވަނީ އިއުލާންކޮށްފައެވެ. އަދި މިތިން ޕާޓީގެ ލީޑަރުންވެސް ބޭނުންވަނީ ހުރިހާ އިދިކޮޅު ޕާޓީތައް އެކުވެ، ރައީސް އިބްރާހިމް މުހައްމަދު ސޯލިހުގެ ވެރިކަން ނިންމުންކަމަށް ހާމަކޮށްފައިވެއެވެ. 

އެކަމާއި ގުޅިގެން މައި އިދިކޮޅު ޕާޓީ، ޕީޕީއެމްއިން އާންމުކުރި ބަޔާނުގައި ރައީސް ސޯލިހުގެ ވެރިކަން ނިންމުމަށް ގުޅިގެން ކުރަމުންދާ މަސައްކަތަށް މަރުހަބާ ކިޔާފައިވެއެވެ. އަދި އެހެނިހެން ޕާޓީތަކާއި ގުޅިގެން މަސައްކަތްކުރުމަށް ހުށަހެޅި ޝަރުތަކީ ގުޅިގެން ނެރޭ ކެންޑިޑޭޓަކީ ރައީސް ޔާމީނަށްވުން ކަމުގައި ބަޔާނުގައި ބުނެފައިވެއެވެ. 

Advertisement

ރައީސް ޔާމީންގެ މައްޗަށް އުފުލާފައިވާ ދައުވާތަކާއި މިހާރު ޝަރީއަތްތައް ކުރިއަށްދާ ގޮތަށް ބަލާއިރު ރައީސް ޔާމީނަށް އިންތިޚާބުގައި ވާދަކުރުމުގެ ފުރުސަތު ވަރަށް ހަންޏެވެ. އެހެންނަމަވެސް ރިޔާސީ އިންތިޚާބަށް ކުޑަތަން ވަމުންދާއިރުވެސް އިތުރު އެހެން ކެންޑިޑޭޓެއް ނެރުމުގެ މަސައްކަތް ކުރަމުންދާތަނެއް ނުފެނެއެވެ.

ޕީޕީއެމްއިން ހާމަކުރާ ގޮތުގައި ރިޔާސީ ކެންޑިޑޭޓުންނަށް ކުރިމަތިލުމަށް ފޯމު ހުށަހެޅުމަށް ހުޅުވާލުމާއެކު ރައީސް ޔާމީންގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅާނެއެވެ. 

ރައީސް ޔާމީން މިހާރުވެސް އަންނަނީ ޖަލު ހުކުމް ތަންފީޒްކުރައްވަމުންނެވެ.