ޕީއެންއެފް އުފެއްދުމުގެ ހުއްދަ މާދަމާ ލިބޭނެ: މަލީހް

ކުރީގެ ރައީސް އަބްދުﷲ ޔާމީން އަބްދުލްޤައްޔޫމް އިސްވެ ހުންނަވައި އުފައްދަވާ ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމުގެ ހުއްދަ މާދަމާ ލިބޭނެ ކަމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވާ މުހައްމަދު މަލީހް ޖަމާލް ވިދާޅުވެއްޖެއެވެ.

ޕީޕީއެމްއިން ވަކިވެވަޑައިގެން އަމިއްލަފުޅަށް އައު ޕާޓީއެއް އުފެއްދުމުގެ މަސައްކަތް ރައީސް ޔާމީން ފައްޓަވާފައިވަނީ މިދިޔަ ބުރާސްފަތި ދުވަހުއެވެ. އެއާއެކު ދެ ދުވަހުގެ ތެރޭ ޕާޓީގެ ނަމާއި ލޯގޯ ފާސްކޮށް އިއްޔެ ވަނީ ޕާޓީ އުފެއްދުމުގެ ކަންކަމާ ގުޅިގެން އިލެކްޝަންސް ކޮމިޝަނާ މަޝްވަރާކުރައްވާފައެވެ.

އެޕާޓީ އުފެއްދެވުމުގައި އިސްކޮށް ހަރަކާތްތެރިވާ މަލީހް ވިދާޅުވީ، ޕީއެންއެފް އުފެއްދެވުމުގެ ހުއްދަ މާދަމާ ލިބޭނެ ކަމުގެ އުފާވެރި ހަބަރު ލިބިފައިވާ ކަމަށެވެ.

Advertisement

ރައީސް ޔާމީންގެ ދަރިކަލުން ޒޭން އަބްދުﷲ ޔާމީންގެ ނަމުގައި އުފައްދަވާ މި ޕާޓީއަށް ފޯމު ފުރުމުގެ ކަންތައްވެސް ވަނީ ރެއިން ފެށިގެން ފަށާފައެވެ. އެޕާޓީގެ އޮފީސް ހިންގަނީ ހ.ހުރަފާ ގޭގެ 3 ވަނަ ފަންގިފިލާގައެވެ.

ޕީޕަލްސް ނެޝަނަލް ފްރޮންޓް އުފެއްދުމުގައި އުޅުއްވާ މުއައްސިސުން

• ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް
• ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު
• ކުރީގެ ކޮމިޝަނަރ އޮފް ޕޮލިސް ހުސައިން ވަހީދު
• މުލިއާގޭގެ ޗީފް އޮފް ސްޓާފް އަހުމަދު މުސްތަފާ
• އަދްލީ އިސްމާއީލް
• ޑރ. ޖިހާދު ހަސަން
• އަލީ އާދަމް، ކަކާގެ

ޕީއެންއެފްގެ ލޯގޯ އާއި ކުލަ ރައީސް ޔާމީން މީގެކުރިން އުފެއްދެވި ޕީޕަލްސް އެލަޔަންސް ނަމާއި ކުލައާއި ވަރަށް ބޮޑަށް އެއްގޮތެވެ.