ޕީއެންސީގެ ޒުވާން ރަޖިސްޓްރާ، އަފޫ ކެނދިކުޅުދޫ ދާއިރާގެ ޕްރައިމަރީއަށް

ސަރުކާރުން ހިންގާ މައި ޕާޓީ، ޕީއެންސީގެ ރަޖިސްޓްރާ، މުޙައްމަދު އަފޫ ޙާމިދު ކުރިއަށް އޮތް މަޖިލިސް އިންތިހާބުގެ ޕްރައިމަރީގައި ވާދަކުރައްވާނެކަން އިއުލާން ކުރައްވައިފިއެވެ.

އަފޫ ރޭ ކުރެއްވި ޕޯސްޓެއްގައި ވިދާޅުވީ، ޕްރައިމަރީގައި ވާދަކުރެއްވުމަށް ކުރިމަތިލެއްވީ ދާއިރާގެ ވަކި ރަށެއް ތަފާތުކުރުމެއްނެތި އެ ރަށެއްގެ ރައްޔިތުން އެދޭ ގޮތަށް ތަރައްގީއާއި ތަހުޒީބާއި ތަމައްދުން، ހަގީގީ މާނައިގައި ހާސިލުކޮށްދިނުމުގެ ސާފު ނިޔަތާއެކު ކަމަށެވެ.

''ކެނދިކުޅޫދޫ ދާއިރާގެ ރައްޔިތުންނަށް ޚިދުމަތްކުރުމުގެ އަޒުމުގައި، ދާއިރާގެ ރައްޔިތުންގެ ލޯތްބާއި އިހުތިރާމާއިއެކު ޕީޕީއެމް/ޕީއެންސީ ޕްރައިމަރީގައި ވާދަކުރުމަށް އެދި ހުށަހަޅަންޖެހޭ ފޯމް ނ.ކެނދިކުޅުދޫގެ ހިތްގައިމު ކުޅި ސަރަހައްދުން ޕްރިންސިޕަލް ސެކްރެޓްރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާޙިމް އަދި މިނިސްޓަރ އޮފް ސްޕޯރޓްސް، ފިޓްނަސް އެންޑް ރެކްރިއޭޝަން ޑރ. އަބްދުﷲ ރާފިއު އާ ހަވާލު ކޮށްފީމެވެ.'' އަފޫގެ ޕޯސްޓުގައިވެއެވެ.

Advertisement

އަފޫ ވަނީ ކެނދިކުޅުދޫ ދާއިރާގެ ޕީޕީއެމް/ޕީއެންސީ އެންމެހާ މެންބަރުންގެ ތާއީދަށް އެދިވަޑައިގެންފައެވެ. މި ދާއިރާގައި ހިމެނެނީ ކެނދިކުޅުދުއާއި ހެނބަދުއާއި ކުޑަފަރިއާއި މާޅެންދުއެވެ.

އަފޫ އަކީ މިދިޔަ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒުގެ ކެމްޕޭން ޓީމުގައި ވަރަށް ފުޅާދާއިރާއެއްގައި ހަރަކާތްތެރިވެފައިވާ ފަރާތެކެވެ.