ނުކުޅެދުންތެރިކަން ހުންނަ މީހުންގެ އެލަވަންސް 6000 އާ ހަމައަށް ބޮޑުކޮށްފި

ނުކުޅެދުންތެރިކަން ހުންނަ މީހުންގެ އެލަވަންސް ގިންތިކޮށް 6،000ރ.އާ ހަމައަށް ބޮޑުކޮށްފި އެވެ.

ދައުލަތުން ދޭ މާލީ އެހީގެ ގޮތުގައި ނުކުޅެދުންތެރިކަން ހުންނަ މީހުންނަށް މިހާރު ކަނޑައަޅާފައި ވަނީ 2،000ރ. އެވެ. މި އެލަވަންސް ބޮޑުކުރަން ގިންތިތަކެއް ހަދައި ބޮޑުކޮށްފައިވާ ކަމަށް ޖެންޑާ މިނިސްޓްރީން ބުންޏެވެ.

އެންސްޕާއިން ހާމަކުރި ގޮތުގައި މިހާރު ދެމުން އަންނަ 2000 ރުފިޔާގެ އިތުރުން 1000 ރުފިޔާގެ އެލަވެންސެއް ދޭން ރައީސް އިބްރާހިމް މުހައްމަދު ސޯލިހް ނިންމަވާފައިވާ ކަމަށެވެ. އެ އެލަވަންސް އެންމެންނަށް ލިބޭނެއެވެ. އެކަމަކު 3000 ރުފިޔާ އިތުރުވާނީ ވަކި ބަޔަކަށެވެ.

Advertisement

ނުކުޅެދުންތެރިކަމުގެ އިނާޔާތުގެ އިތުރުން ވެސް އިތުރު އިނާޔަތްތަކެއް ސަރުކާރުން ވަނީ ތައާރަފްކޮށްފައެވެ. އަލަށް ތައާރަފް ކުރެވެނީ ހުރި ނުކުޅެދުންތެރިކަމުގެ ސަބަބުން އަމިއްލަ އަށް ނޫޅެވޭ ނުވަތަ އެހެން ފަރާތަކުން ބަލަހައްޓަން ޖެހޭ ފަރާތްތަކަށް ދޭ ކެއާރާ އެލަވަންސް، ނުކުޅެދުންތެރިކަމުގެ ސަބަބުން އާންމުކޮށް ބޭނުންކުރާ ތަކެތީގެ އިތުރުން އަސާސީ ބައެއް ތަކެތި ހޯދަން ޖެހޭ ފަރާތްތަކަށް ދޭ ސެލްފް ކެއާ އެލަވަންސަކާއި، އެއް ގޭބިސީއެއްގައި ނުކުޅެދުންތެރިކަން ހުންނަ ތިން މީހުންނަށް ވުރެ ގިނަ މީހުން ދިރިއުޅޭ ގޭބިސީތަކުގައި އުޅޭ ނުކުޅެދޭ މީހުންނަށް ދޭ އެލަވަންސެވެ.

އެލަވަންސް ދޭ ކެޓަގަރީތަކާއި ބޮޑުވާނެ ވަރު

- ނުކުޅެދުންތެރިކަމުގެ ސަބަބުން އަމިއްލައަށް ނޫޅެވޭ ނުވަތަ އެހެން ފަރާތެއް ބަލަހައްޓަން ޖެހޭ ފަރާތްތަކަށް 2000ރ. (މި ކެޓަގަރީގައި ހިމެނެނީ 65 އަހަރުން ދަށުގެ މީހުން)

- ނުކުޅެދުންތެރިކަމުގެ ސަބަބުން އަސާސީ ބޭނުންތަކަށް އާންމުކޮށް ބޭނުންކުރަން ޖެހޭ އިތުރު ތަކެތި- ކޮންސިއުމަބަލް ހޯދުމަށް އެހީތެރިވުމަށް 1000ރ. (މި ކެޓަގަރީގައި ހިމެނެނީ 65 އަހަރުން ދަށުގެ މީހުން)

- އެއް ގެއެއްގައި ނުކުޅުންތެރިކަން ހުންނަ މީހުން ތިން މީހުންނަށް ވުރެން ގިނަ ނަމަ މީހަކަށް 1،000ރ. ލިބޭ (65 އަހަރުން ދަށުގެ މީހުން)

ނުކުޅެދުންތެރިކަން ހުންނަ މީހުންގެ އެލަވެންސް ބޮޑު ކޮށްފައި މި ވަނީ މިހާރު ލިބޭ އެލަވަންސް ކުޑަ ކަމުން ގިނަ ދަތިތަކާ ކުރިމަތިވާ ކަމުގެ ޝަކުވާ ކުރާތާ ގިނަ އަހަރުތަކަކަށް ފަހު އެވެ.