ނިޒާމުގެ ވާހަކަ ދައްކަން ނަޝީދުއާ ބައްދަލު ކުރަން ޔާމީން އިންކާރުކުރައްވައިފި

ވެރިކަން ކުރުމުގެ ނިޒާމް ބަދަލު ކުރުމާ ގުޅޭ ގޮތުން ކުރީގެ ރައީސް އަބްދުﷲ ޔާމީން އާ ބައްދަލު ކުރެއްވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގަތުމުން އެމަނިކުފާނާ ބައްދަލުކުރަން ބޭނުން ނުވާ ކަމަށް ޔާމީން އަންގަވައިފިއެވެ.

މި މަހު 30 ގައި އޮންނަ ރިޔާސީ އިންތިޚާބުގެ ދެވަނަ ބުރުގެ ކުރިން ނިޒާމާ ބެހޭ ފެންނަ ނުފެންނަ ވޯޓެއް ނަގަން ގޮވާލައި ނަޝީދާއި އެ މަނިކުފާނުގެ ދަ ޑިމޮކްރެޓްސް ޕާޓީން އަންނަނީ އެހެން ސިޔާސީ ޕާޓީތަކާ އެކު މަޝްވަރާ ކުރަމުންނެވެ. އެ މަޝްވަރާތަކުގެ މަތިން ޔާމީނާ އެކު މަޝްވަރާ ކުރަން ނިންމައި، މަޖިލީހުގެ ރައީސްގެ ހައިސިއްޔަތުން ނަޝީދު ވަނީ ޔާމީނާ ބައްދަލުކުރައްވާނެކަން އިއްޔެ އިއުލާންކޮށްފައެވެ.

ނަޝީދު ވަނީ މިފަހުން ޔާމީން މިނިވަންކުރަން ގޮވާލައި ޕީޕީއެމްއިން ބޭއްވި ރެލީއެއްގައި ވެސް ޔާމީންގެ އަނބިކަނބަލުން ފާތުމަތު އިބްރާހިމްއާ ބައްދަލު ކުރައްވާ ސަލާމް ކުރައްވައިފައެވެ. އަދި ޔާމީން މިނިވަން ކުރަން މުޒާހަރާތަކަށް ވެސް ނުކުންނަވާނެ ކަމަށް ޑިމޮކްރެޓްސްއިން ބޭއްވި ޖަލްސާއެއްގައި ނަޝީދު ހަރުއަޑުން ގޮވާލެއްވިއެވެ.

Advertisement

އެކަމަކު "ރަށްފުށު އޮންލައިން" އަށް މިއަދު މޯލްޑިވްސް ކަރެކްޝަނަލް ސާވިސްގެ މީޑިއާ އޮފިސަރަކު ވިދާޅުވީ ނަޝީދު ބައްދަލު ކުރައްވަން ހުށައެޅުއްވި ނަމަވެސް ޔާމީން އެކަމަށް އިންކާރުކުރައްވާ އެކަން މަޖިލިސްއަށް ކަރެކްޝަންސްއިން އަންގައިފައިވާ ކަމަށެވެ.

"ޢަބްދުﷲ ޔާމީން ޢަބްދުލް ޤައްޔޫމް ބައްދަލުކުރުމަށް އިއުތިރާޒްވުމުން، އެކަން ލިޔުމުން މަޖްލިހަށް ވަނީ އަންގާފައި" ކަރެކްޝަނަލް ސާވިސްގެ މީޑިއާ އޮފިސަރު ވިދާޅުވިއެވެ.

ޑިމޮކްރެޓްސް އިން މީގެ ކުރިން ބުނެފައި ވަނީ އެ ޕާޓީން ޕީޕީއެމް އާއެކު ކުރި މަޝްވަރާގައި އެއްވެސް އެއްބަސްވުމެއްގައި ސޮއި ކުރަން ޕީޕީއެމް އިން ދެކޮޅު ހަދާ ކަމަށެވެ. އަދި އެއްބަސްވުމެއްގައި ސޮއި ނުކުރާނަމަ ގުޅިގެން މަސައްކަތް ކުރަން ދަތިވާނެ ކަމަށް އެ ޕާޓީން ބުންޏެވެ.

މީގެ ކުރިން ނިޒާމީ ވޯޓެއް ނަގާފައިވަނީ 2007 ވަނަ އަހަރެވެ. އެ އަހަރުގެ ވޯޓުގައި ޔާމީންގެ އޭރުގެ ޕާޓީ ޕީޕަލްސް އެލަޔަންސް (ޕީއޭ)އިން ތާއީދު ކުރީ ބަރުލަމާނީ ނިޒާމަކަށެވެ.