ނަޝީދު ހަރު އަޑުން ގޮވާލީ ޔާމީން މިނިވަން ކުރަން، މުޒާހަރާއަށް ވެސް ނުކުންނާނެ!

ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރަން މުޒާހަރާއަށް ނުކުންނަވާނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ޑިމޮކްރެޓްސްގެ ކެނޑިޑޭޓް، އިލްޔާސް ލަބީބުގެ ކެމްޕޭނަށް ޏ. ފުވައްމުލަކަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަ ދައްކަވަމުން ނަޝީދު ވިދާޅުވީ، ކެމްޕޭނަށް ފަހަކަށް އައިސް ގިނަ ރަށްތަކަށް ދެވުނު ނަމަވެސް، ރައީސް އިބްރާހިމް މުހައްމަދު ސޯލިހަށް ތާއިދު އޮތް ރަށަކަށް ނުދެވޭ ކަމަށާއި ސެޕްޓެމްބަރު 9 ގަ މި ވެރިކަން ނިމިގެންދާނެ ކަމަށެވެ.

މި ސަރުކާރުން ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި ދޭތެރޭ އަމަލު ކޮށްފައިވާ ގޮތަކީ އެއީ އެންމެން ވެސް ކަންބޮޑުވާ ކަމެއް ކަމަށާއި އެމްއެމްޕީއާރުސީގެ ވައްކަމުގެ މައްސަލައިގައި 273 މީހުން ހިމެނޭ ކަމަށެވެ. ނަމަވެސް އެމައްސަލައިގައި އެންމެ ބޭފުޅަކު ހިފައި ހައްޔަރުކޮށް، ފަސް އަހަރުވީމާ އެއީ އިންސާފުގެ ގޮތުގައި ބަލައި ގަނެވޭނެ ކަމެއް ނޫން ކަމަށް ނަޝީދު ވިދާޅުވިއެވެ.

Advertisement

"ރައީސް ޔާމީން ހަމަ މިހާރު ޖެހޭނީ ދޫކޮށްލާން،" ނަޝީދު ވިދާޅުވި އެވެ.

"ރައީސް ޔާމީން، ދޫކޮށްލާ، ރައީސް ޔާމީން، ދޫކޮށްލާ، ރައީސް ޔާމީން، ދޫކޮށްލާ،" ނަޝީދާއި ސަޕޯޓަރުން އެކުގައި ފޯރީގައި ގޮވި އެވެ.

އެއާއެކު ނަޝީދު ވިދާޅުވީ ޔާމީން މިނިވަންކުރުމަށް ކުރިއަށް ގެންދާ ހަރަކާތްތަކުގައި އަމަލީ ގޮތުން ވެސް ޑިމޮކްރެޓްސް އިން ބައިވެރިވާނެ ކަމަށެވެ.

"އަޅުގަނޑުމެން އިހުތިޖާޖުގައި ވެސް ބައިވެރިވާނަން. ތި ބޭފުޅުންނާ އެކުގައި މަގުމަތީގައި ވެސް ތިބޭނަން. ބައިނަލްއަގުވާމީ ފަރާތްތަކާ އެކުގައި ވާހަކަ ދައްކަން ވެސް ދާނަން. އެކިއެކި ބައިނަލްއަގުވާމީ ވަކީލުން ދިވެހިރާއްޖެއަށް ވަޑައިގެން ވަކާލާތު ވެސް [ޔާމީންގެ މައްސަލައިގައި] ކުރައްވާނެ. ރައީސް ޔާމީން އިރާދަ ކުރެއްވިއްޔާ އަޅުގަނޑުމެން ޖަލުން ނެރޭނަން،" ނަޝީދު ވިދާޅުވި އެވެ.