ނަޝީދުގެ ތުހުމަތު: މަޖިލިސް ހުއްޓުވާފައި މިއޮތީ ސީދާ ރައީސްގެ ބައިވެރިވުމާއެކު

ރައްޔިތުންގެ މަޖިލީހުގެ ކޯރަމް ހަމަނުވުމުގެ ސަބަބުން މަޖިލިސް ހުއްޓިފައި އޮތީ ސީދާ ރައީސުލްޖުމްހޫރިއްޔާގެ ބައިވެރިވުމާއެކުގައިކަމަށް މަޖިލީހުގެ ރައީސް މުހައްމަދު ނަޝީދު ތުހުމަތުކުރައްވައިފިއެވެ. 

ރައްޔިތުންގެ މަޖިލީހުގައި 87 މެމްބަރުން ތިއްބަވާއިރު، ކޯރަމް ހަމަވާނީ 22 މެމްބަރުންނާއެކުގައެވެ. މިއަދުގެ ޖަލްސާއަށް ހާޒިރުވެ ތިއްބެވީ 17 މެމްބަރުންނެވެ. 

ރައީސް ނަޝީދު ވަނީ ތަޅުމަށް ވަޑައިނުގަތް، މަޖިލީހުގެ ގޯތިތެރޭގައި މެމްބަރުން ތިއްބެވިކަން ފާހަގަކުރައްވާފައެވެ. އަދި އެމެމްބަރުން ތަޅުމަށް ވަޑައިގެންނެވުމަށް އެދިވަޑައިގެންފައިވެއެވެ.

Advertisement

"ދިވެހި ދައުލަތުގެ ބާރުތައް އަތްޕުޅު މައްޗަށް ނަންގަވައި، ދައުލަތް ހުއްޓުވުމަށް ތިޔަކުރައްވާ މަސައްކަތް ހުއްޓުވުމަށް ދަންނަވަން"

ރައީސް ނަޝީދު ވަނީ މަޖިލީހުގެ މަސައްކަތް ނުހުއްޓި ކުރިއަށް ގެންދަވާނެކަމަށް ވިދާޅުވެފައެވެ. އަދި މަޖިލިސް "ސަބަޓޯޖް"ކޮށް މަޖިލީހުގެ މަސައްކަތްތައް ހުއްޓުވުމަށް ކުރައްވާ މަސައްކަތް ހުއްޓުވުމަށް ރައީސަށް ދަންނަވާފައިވެއެވެ. 

ކޯރަމް ހަމަކޮށް، މަޖިލީހުގެ މަސައްކަތް ފެށޭވަރުވެފައިވަނީ ގާތްގަނޑަކަށް 10:00ހާއިރުއެވެ. 

މިއަދުގެ ޖަލްސާގައި ޗާގޯސް މައްސަލައާއި ގުޅިގެން އިދިކޮޅު ޕީޕީއެމް، ޕީއެންސީން ހުށަހަޅާފައިވާ ގަރާރުގެ މަސައްކަތާއި ނިޒާމުގެ ވޯޓާއި ގުޅޭގޮތުން ޑިމޮކްރެޓްސްއިން ހުށަހަޅާފައިވާ ގަރާރު ވަނީ ތާވަލުކޮށްފައެވެ.